Kështu ka bërë të ditur për teve1.info, zëdhënësi i kryeministrit Kurti, Përparim Kryeziu. Sipas tij, në këtë letër, Kurti ka propozuar që të fillojë hartimi i një ligji të ri, i cili e nis një proces të vlerësimit dhe verifikimit të të gjithë pjesëmarrësve të luftës çlirimtare.
Ndërkaq, derisa të përfundojë ky proces, Kurti ka propozuar që të punësojë veteranët dhe t’u subvencionojë një pjesë të pagës për një periudhë të caktuar.
“Hartimi i ligjit dhe procesi i verifikimit të kryhet në një kohë sa më të shpejtë. Ndërkohë, derisa të përfundojë ky proces, si mbështetje shtesë, kryeministri Kurti propozon përkrahje në punësimin e veteranëve përmes masave aktive të tregut të punës, duke subvencionuar një pjesë të pagës për një periudhë të caktuar. Ne besojmë se me këtë propozim sigurohemi që të kemi një listë përfundimtare dhe të saktë të veteranëve, duke i bërë nder luftës dhe sakrificës së popullit tonë dhe duke mundësuar një trajtim të dinjitetshëm atyre që dhanë kontributin e tyre në çlirimin e vendit”, ka thënë ai.
Kryeziu tutje ka shtuar se alternativë ndaj këtij propozimi të kryeministrit Kurti mbetet zbatimi i ligjit në fuqi për kategorizimin e veteranëve.
“Alternativë ndaj këtij propozimi të kryeministrit Kurti mbetet zbatimi i ligjit në fuqi për kategorizimin e veteranëve, i cili në momentin e miratimit, nga çfarë kemi kuptuar në takimin e qershorit, ka pasur edhe mbështetjen e OLV të UÇK-së. Të dy alternativat do të zhvilloheshin veçmas dhe pa e penguar apo ndikuar procesin gjyqësor në zhvillim e sipër”, ka thënë ai.
Më 17 qershor, përfaqësuesit e OVL-UÇK-së kishin zhvilluar takim me Kurtin, një ditë pas protestës së veteranëve para oborrit të Kuvendit për shkak të mospërfshirjes së tyre në Projektligjin për pagën minimale.
Pas atij takimi, Klinaku kishte bërë të ditur se nuk kishin arritur një dakordim, por që Kurti u kishte thënë se do u propozonte diçka me shkrim. /Teve1.info/