Kryetarja e Kuvendit të Kosovës, Albulena Haxhiu, ka dhënë sqarime lidhur me mos-thirrjen e një seance të jashtëzakonshme pas vendimit të Gjykatës Speciale në Hagë.
Haxhiu tha se për një seancë të tillë nuk ka pasur asnjë kërkesë zyrtare, ndërsa theksoi se, sipas Rregullores së Kuvendit, kryetarja nuk ka të drejtë ta thërrasë vetë një seancë të jashtëzakonshme.
“Po ashtu, në raport me këtë, më lejoni që të sqaroj që janë bërë kritika pse nuk kam thirrur një seancë pas vendimit të Hagës. Nuk ka pasur asnjë kërkesë për një seancë të jashtëzakonshme. Sipas rregullores, kryetarja e Kuvendit nuk ka të drejtë të thërrasë seancë të jashtëzakonshme”, tha Haxhiu.
Ajo bëri të ditur se Kryesia ka vendosur që seanca e radhës e Kuvendit të mbahet të hënën, në orën 11:00. Sipas saj, në rend dite do të jetë edhe një deklaratë lidhur me procesin gjyqësor në Hagë, e cila pritet të hartohet me kontributin e grupeve parlamentare.
“Kryesia e Kuvendit vendosi që seanca e radhës të mbahet të hënën, në orën 11:00, me pika të rëndësishme të rendit të ditës. Së pari me betimin e deputetëve të rinj, pastaj me miratimin e një deklarate që lidhet me procesin në Hagë, përkatësisht me vendimin e padrejtë të Gjykatës Speciale. Jemi dakorduar që paraprakisht të mos vendosen deputetët para një akti të kryer, mirëpo që të kontribuojmë në draftimin e kësaj deklarate. Të jetë një qëndrim i Kuvendit. Deklaratat nuk kanë peshë juridike, por të jetë një qëndrim i Kuvendit”, deklaroi ajo.
Haxhiu është pyetur edhe për nismën e PDK-së lidhur me ndryshimin dhe plotësimin e Ligjit për Dhomat e Specializuara. Ajo tha se nuk dëshiron ta paragjykojë këtë nismë, por theksoi se nuk do të mbështesë iniciativa që, sipas saj, bëhen vetëm për të krijuar përshtypjen se po ndërmerret ndonjë veprim.
“Pa paragjykim, për projektligjin që është proceduar, mendoj që është shumë i rëndësishëm çdo veprim. Refuzoj të mbështes çfarëdo iniciative që ka për qëllim veç me u duk që po bëjmë diçka. Nuk po du me paragjyku nismën e PDK-së. I ftoj grupet që të mos bëjnë propozime vetëm sa për t’u dukur që megjithatë po bëjmë diçka dhe nuk kanë ndonjë peshë”, tha Haxhiu.
Në fund, ajo bëri thirrje për kujdes në deklarimet lidhur me procesin në Hagë.
“Në këtë fazë, pas vendimit të padrejtë të shkallës së parë, secili nga ne duhet të jemi të kujdesshëm”, deklaroi Haxhiu.
