Prej pesë javës po përballen me një pamje të tilla.
Kjo pasi në rrugicat e lagjes “Kodra e Trimave”, të Prishtinës, nuk po merren më mbeturinat.
Njëra nga këto rrugica është edhe ajo “Shahsi”.
“Rrugës kryesore po e marrin, po kësaj rrugicës sonë nuk po hyn. Nuk po e di pse. Pagesat po i bëjmë. Ose le të na i kthejnë paret dhe e bëjmë ne në mënyrë vetanake, ose paguajmë ndonjë transport. Po kështu edhe nëse ata nuk na marrin mbeturinat dhe po na lypin pagesat e mos e bëj Zot me na dërguar te përmbarusi çka me bërë?”, shprehet Sami Dili-qytetar.
Për këtë Dili thotë se përgjigje kanë kërkuar edhe nga Kompania “Pastrimi”.
“Kam fol, ata zyrtarët që po më lajmërohen në një numër te Pastrimi, vimë, jo sot, jo sot. Po presim nëse vinë me na marrë mirë, nëse s’vinë duhet me u organizu lagjia ose me vendos në rrugën kryesore ose me ngarku dhe me dërguar tek Pastrimi direkt”, thotw ai.
E “hallin”, e kanë edhe në përhapjen e ndonjë sëmundje te fëmijët.
“Ne kemi fëmijë këtu shumica dhe ata dalin e luajnë këtu se nuk kanë ku luajnë, në rrugë kryesore s’kanë ku lujnë, ka autobus, automjete po luaj këtu. Nëse vazhdon kështu është e pamundshme pa u sëmurë ndonjë fëmijë. Kemi edhe pleq dhe të sëmur, çka nëse e merr ndonjë sëmundje? Kujt t’i ankohemi?”, shprehet Dili banorw.
Me problem të njëjtë po ballafaqohen edhe banorët e rrugës “Rexhep Terpeza”, në këtë lagje.
“Kompania e din ma mirë se ne se ata i kanë menaxherat, e din ku me shku, ku e kanë terrenin. Po këtu prej drejtorisë është problemi. Atje në drejtori dikush nuk është duke e menaxhuar mirë. Çka është problemi ata e din vet”, thotë qytetari Mehmet Berisha.
E në kompaninë “Pastrimi”, arsyetohen se mos-largimi i mbeturinave në këto rrugica ka ndodhur për shkak të defekte të automjeteve grumbulluese.
“Sa i përket rrugës “27 Nëntori”, përkatësisht rrugicave “Shahsi” dhe “Rexhep Terpeza” në Vranjevc, jemi të informuar për situatën dhe shqetësimet e qytetarëve. Gjatë kësaj periudhe jemi përballur me disa vështirësi teknike dhe defekte të automjeteve grumbulluese, të cilat kanë ndikuar në dinamikën e planifikuar të operimit dhe, në raste të caktuara, kanë shkaktuar vonesa në realizimin e shërbimit. Ekipet tona janë duke punuar për tejkalimin e këtyre vështirësive dhe largimi i mbeturinave në rrugët e lartpërmendura do të realizohet sa më shpejt që të jetë e mundur. Pas normalizimit të situatës, grumbullimi i mbeturinave do të vazhdojë sipas dinamikës së rregullt të paraparë për këtë zonë”, thuhet nga kompania.
E nëse ky problem nuk zgjidhet banorët thonë se mendojnë edhe të protestojnë.
