Deputeti i Lëvizjes Vetëvendosje, Vigan Qorrolli, u është drejtuar partive opozitare pas vendimit të Gjykatës Kushtetuese lidhur me situatën institucionale në vend.
Qorrolli ka thënë se, pas konstatimeve të Kushtetueses, sipas tij, mbetet që Kuvendi të vazhdojë me procedurën për zgjedhjen e Presidentit të Republikës. Në të kundërtën, ai ka paralajmëruar mundësinë e shkuarjes së vendit në zgjedhje.
Duke iu drejtuar PDK-së, LDK-së dhe Aleancës, Qorrolli ka kërkuar që të ulen dhe të votojnë për zgjedhjen e Presidentit.
“Gjykata Kushtetuese e tha shumë qartë: Kuvendi është legjitim dhe Qeveria është zgjedhur në përputhje me Kushtetutën. Brenda dy javësh, deri më 6 tetor, duhet të zgjidhet Presidenti i Republikës. Pra, PDK, LDK e Aleanca: ose ulemi, votojmë dhe e përmbyllim këtë proces institucional, ose vendi shkon në zgjedhje në mesin e nëntorit. Hajdeni ta zgjedhim presidentin”, ka shkruar Qorrolli.
Ai ka thënë se, në rast se nuk arrihet zgjedhja e Presidentit dhe vendi shkon në zgjedhje, përgjegjësinë për këtë situatë, sipas tij, do ta mbajë opozita.
“Nëse jo, vetëm ju jeni përgjegjës”, ka deklaruar Qorrolli.
Qëndrimi i tij vjen pas zhvillimeve të fundit kushtetuese dhe debatit politik rreth përmbylljes së procesit institucional në vend.
