Deputetët e Partisë Demokratike të Kosovës, u panë në hollin e Kuvendit të hënën.
E me vete e kishin edhe një kërkesë.
Këtë të fundit e dorëzuan të hënën në organin legjislativ.
Përmes saj, po e kërkojnë ndryshimin dhe plotësimin e ligjit për Dhomat e Specializuara dhe Zyrën e Prokurorit të Specializuar.
E gjitha kjo, pas aktgjykimit dënues të 16 shtatorit ndaj ish-krerëve të UCK-së.
“Sot, pas më shumë se një dekade, ekziston një fakt që kërkon përgjigje. Në Dhomat e Specializuara nuk është ngritur një rast lidhur me pretendimet e Martyt. Nëse Kosova krijoi këtë Gjykatë me mision të posaçëm, a duhet që ky mision të ketë një kufi? Projektligji jep një përgjigje të qartë. Nuk kërkon mbylljen e Dhomave të Specializuara. Nuk kërkon që akuzat që lidhen me pretendimet për të cilat u krijuan Dhomat e Specializuara të mos hetohen. Ato raste do të vazhdojnë të jenë pjesë e mandatit të tyre. Kjo nuk është nismë për pandëshkueshmëri. Është nismë për të paracaktuar se kush ka të drejtë të gjykojë çfarë”, bëri të ditur Bedri Hamza kryetar i partisë.
Ai tha se nisma synon që nëse rasti të kthehet në rigjykim, procesi të vazhdojë në Kosovë.
“Sipas zgjidhjes së propozuar, procedurat aktuale vazhdojnë deri në përfundimin e fazës së Apelit, por nëse një rast rikthehet në rigjykim, ai nuk do të nisë nga e para në Hagë. Në atë moment zbatohet juridiksioni i ri dhe, kur të plotësohen kushtet, rasti do të kalojë për procedim në Kosovë”, sqaroi Hamza.
Për gjithë këtë, Hamza kërkoi përkrahjen e partive të tjera parlamentare.
“Kam biseduar me kryetarët e tri subjekteve të tjera politike: LVV-së, LDK-së dhe Aleancës. Jam i bindur se ekziston arsye e plotë që ky ligj të ketë përkrahjen me votë të këtyre subjekteve politike. U bëj thirrje publike që të na përkrahin me këtë iniciativë ligjore”, u shpreh Hamza.
Por, ish kryetari i Gjykatës Supreme, Fejzullah Hasani tha kjo kërkesë e PDK-së, vështirë se mund të zbatohet.
“Ajo arkitektura e infrastrukturës ligjore është e tillë që çdo institucion i Republikës së Kosovës është përjashtu nga mundësia për të ndërhy në këtë dhomë.Kur e merrni e shikoni ligjin për dhoma të specializume, marrëveshjen që është lidhe mes Kosovës dhe Bashkimit Evropian për sundimin e ligjit, pastaj letrën e Atifete Jahjagës të vitit 2014-të, Cdo mundësi e prekjes në infrastrukturën ligjore, dmth qoftë ligji mbi dhomat e specializuara ose dimensionet e tjera, institucionet e Kosovës e kanë të pamundur me përjashtu, vet me miratimin e ligjit e kanë përjashtu çdo institucion të Kosovës”, vlerëson Hasni.
Ndryshe, mbështetje për nismën ligjore të PDK-së, ofroi të hënën edhe Aleanca.
