E diela i gjeti pranë Rektoratit të Universitetit të Prishtinës.
Kështu, parlamenti studentor dolën sot para medieve.
E krejt kjo për të njoftuar për marshin që do ta mbajnë këtë të hënë në mbështetje të ish-krerëve të UÇK-së që po gjykohen në Hagë.
Ata thonë se përmes tij duan të shprehin mbështetjen për ish-krerët e UÇK-së që po gjykohen në Hagë.
“Marshi bën thirrje për unitet, dinjitet dhe solidaritet në një moment të rëndësishëm për vendin tonë. Studentët e UP-së, së bashku me studentë nga universitetet tjera publike e private, kanë përgatitur edhe një memorandum me gjashtë pika, i cili do të lexohet nga kolegët dhe do të publikohet pas përfundimit të marshit”, tha Flon Kastrati nga parlamenti studentor.
Kërkesa e tyre është që mbështetja për të akuzuarit në Hagë të vazhdojë gjatë gjithë procesit.
“Parlamenti Studentor i Universitetit të Prishtinës ndjen obligim moral dhe përgjegjësi qytetare që të ngrejë zërin sot ndaj vendimit që e konsiderojmë thellësisht të padrejtë ndaj çlirimtarëve tanë. Nuk kemi se si të jemi të qetë derisa ata që na e sollën me lirinë, falë të cilëve ne sot studiojmë dhe arsimohemi të lirë, gjenden në Hagë”, deklaroi Donart Humolli nga parlamenti studentor.
Ndërkaq, studentët presin që nesër t’u bashkohen edhe kolegë nga universitete të tjera të Kosovës dhe nga Maqedonia e Veriut.
“Në këtë linjë, kërkojmë mbështetje financiare të pakushtëzuar, si dhe mbështetje të plotë politike e morale për të akuzuarit deri në përfundimin e këtij procesi dhe derisa t’i kemi çlirimtarët tanë në shtëpitë e tyre, pranë familjeve të tyre. Si Parlament Studentor dhe si studentë, jemi të vetëdijshëm se po kalojmë nëpër një situatë të vështirë dhe të rëndë. Për këtë arsye, e shohim më se të nevojshme të bëjmë një thirrje të hapur për unitet kombëtar”, deklaroi Humolli.
Gjithashtu, studentët potencuan mbështetjen e tyre të pastër kundrejt kësaj situate, derisa kërkuan nga subjektet politike të jenë më të bashkuara në këto momente.
