Avokati kroat, Luka Mistetic, ka thënë se mbrojtja do ta apelojë aktgjykimin e djeshëm të Trupit Gjykues, meqë janë bërë gabime të rëndësishme në ligj dhe në vlerësimin e fakteve. Sipaas Misetic, gabimet e tilla e cenojnë drejtësinë e procesit gjyqësor.
Misetic ka thënë se mbrojtja gjatë gjithë kohës ka pasur shqetësime lidhur me drejtësinë procedural dhe përfshirjen e drejtpërdrejtë të trupit gjykues me pyetje, gjë që sipas Misetic të krijonte përshtypjen për anshmëri.
“Gjatë gjithë gjykimit, Mbrojtja ka ngritur vazhdimisht shqetësime lidhur me drejtësinë procedurale, përfshirë shtrirjen e gjerë të pyetjeve të bëra drejtpërdrejt nga anëtarët e Trupit Gjykues, në një mënyrë që nuk krijonte përshtypjen e paanshmërisë. Mbrojtja mban qëndrimin se ndërhyrjet gjyqësore e kanë tejkaluar kufirin e kërkimit neutral të së vërtetës, duke cenuar përshtypjen e paanshmërisë që kërkohet sipas standardeve ndërkombëtare të drejtësisë. Kjo mungesë paanshmërie tashmë përshkon edhe aktgjykimin e Trupit Gjykues”, ka shkruar Misetic.
Misetic ka thënë se trupi gjykues e ka përfshrirë Thaçin në rastin e vrasjes së Bejadin Allaqit, ndërkohë që paraprakisht kishte urdhëruar që palët të mos diskutonin për këtë rast në seancë publike dhe se kishte urdhëruar që të gjitha provat të mbaheshin konfirenciale.
“Mbrojtja argumenton se gjetjet e Trupit Gjykues për fajësinë përtej dyshimit të arsyeshëm mbështeten në prova të pamjaftueshme dhe të pakonfirmuara. Për më tepër, Trupi Gjykues dje deklaroi publikisht se z. Thaçi ishte i përfshirë në vrasjen e Behajdin Allaqit, pasi kishte urdhëruar të gjitha palët në këtë çështje që të mos e diskutonin rastin e z. Allaqi në seancë publike dhe pasi kishte urdhëruar që të gjitha provat lidhur me këtë rast të mbaheshin konfidenciale”, u shpreh Misetic
Tutje ai tha se ka shpallur Thaçin fajtor për një vrasje, ndërkohë që provat mbi të cilat është bazuar ky përfundim i janë mbajtur të fshehura shqyrtimit publik.
Kështu, Trupi Gjykues e ka shpallur publikisht z. Thaçi fajtor për një vrasje, ndërkohë që provat mbi të cilat është bazuar ky përfundim i janë mbajtur të fshehura shqyrtimit publik. Z. Thaçi do ta mirëpriste shqyrtimin publik të këtyre provave. Mbrojtja do t’i apelojë vendimet e Trupit Gjykues për shkelje të të drejtave të tij themelore për një gjykim të drejtë, të garantuara nga Konventa Evropiane për të Drejtat e Njeriut dhe Kushtetuta e Kosovës. Z. Thaçi e mohon shprehimisht çdo përfshirje në vrasje”, ka thënë Misetic.
“Respektimi i standardeve rigoroze të drejtësisë procedurale është thelbësor për ruajtjen e besimit të publikut në institucionet ndërkombëtare të drejtësisë penale. Mbrojtja do të dorëzojë zyrtarisht njoftimin e apelit për të korrigjuar këto gabime faktike, ligjore dhe procedurale pranë Panelit të Apelit”, ka shtuar ai.
