Ish-emisari amerikan për dialogun Kosovë-Serbi, Richard Grenell, ka reaguar ashpër pas aktgjykimit të Dhomave të Specializuara në Hagë ndaj ish-presidentit të Kosovës, Hashim Thaçi, duke e cilësuar dënimin e tij si “skandaloz” dhe duke kërkuar hapa për shpërbërjen e Gjykatës Speciale.
Thaçi është dënuar me 25 vjet burgim. Me të njëjtin aktgjykim, Jakup Krasniqi është dënuar me 25 vjet, Kadri Veseli me 18 vjet, ndërsa Rexhep Selimi me 13 vjet burgim.
Në një reagim të publikuar pas aktgjykimit, Grenell ka kritikuar ashpër vendimin ndaj Thaçit.
“Dënimi i shpallur nga Gjykata e Hagës ndaj Hashim Thaçit, për një luftë të 25 vjetëve më parë, është skandaloz”, ka shkruar Grenell.
Ai ka kritikuar edhe mënyrën e funksionimit të gjykatave ndërkombëtare, duke pretenduar se në to merren vendime politike.
“Askush nuk është i sigurt nga këto gjykata ndërkombëtare, ku elitat akademike marrin vendime politike”, ka shkruar ai.
Grenell ka bërë kritika edhe ndaj trupit gjykues dhe prokurorit, duke përdorur një gjuhë të ashpër ndaj tyre. Ai ka përmendur në mënyrë të veçantë gjyqtarin zviceran Guénaël Mettraux.
“Gjyqtari zviceran Guenael Mettraux ishte udhëheqësi i vërtetë, duke injoruar çështjet ligjore dhe duke zgjedhur në vend të tyre politikën e Jack Smithit”, ka deklaruar Grenell.
Në reagimin e tij, Grenell ka kërkuar gjithashtu ndërprerjen e financimit për gjykata të tilla, duke iu drejtuar Departamentit amerikan të Drejtësisë dhe Todd Blanche.
“Të gjitha këtyre gjykatave duhet t’u ndërpritet menjëherë financimi. Departamenti i Drejtësisë dhe Todd Blanche duhet të veprojnë shpejt. Amerikanët po paguajnë për këto ndjekje politike dhe kjo duhet të ndalet”, ka shkruar ai.
Në fund, Grenell i është drejtuar edhe kryeministrit të Kosovës, Albin Kurti, dhe deputetëve të Kuvendit, duke kërkuar që të ndërmerren hapa për shpërbërjen e Gjykatës Speciale.
“Albin Kurti gjithashtu duhet të veprojë shpejt për ta shpërbërë këtë Gjykatë të huaj. Anëtarët e Parlamentit duhet të punojnë me Kurtin që kjo të ndodhë. Kosovës nuk i duhet një gjykatë në Holandë”, ka përfunduar Grenell.
Deklaratat e Grenellit janë reagim i tij personal ndaj aktgjykimit dhe përmbajnë vlerësime dhe pretendime të tij për procesin gjyqësor.
