Konsulenti politik, Ilir Deda, ka bërë thirrje për qetësi dhe gjakftohtësi te qytetarët e Kosovës në prag të shpalljes së verdiktit për ish-krerët e Ushtrisë Çlirimtare të Kosovës në Hagë.
Deda ka thënë se dita e nesërme ka një rëndësi të veçantë për Kosovën, duke u bërë thirrje qytetarëve që të mos u besojnë spekulimeve lidhur me vendimin që pritet të merret nga Dhomat e Specializuara.
Në emisionin “Këndi i Debatit” në Tëvë1, ai ka theksuar se, pavarësisht rezultatit të procesit gjyqësor, nuk duhet të ketë tensione apo destabilizim në vend.
“Kisha apeluar te qytetarët e Kosovës që ta ruajnë gjakftohtësinë. Ne të gjithë shpresojmë dhe besojmë në një verdikt pozitiv. Nuk dihet cili është vendimi, ka shumë spekulime, por të mos u besojnë spekulimeve dhe të mos i dëgjojnë. Ta presim ditën e nesërme dhe të shohim çfarë po ndodhë, dhe të mos ketë kaq shumë shqetësim, sepse njerëzit janë të shqetësuar për vetë vendimin, çfarë do të thotë ai për Kosovën, por janë të shqetësuar edhe mos po ka ndonjë lloj destabilizimi tek ne brenda. Nuk ka nevojë të ketë destabilizim brenda Kosovës. Unë më shumë e kam këtë brengë që e kam parë te njerëzit këto dy ditë, që është për gjynah që nuk u është drejtuar askush për t’i qetësuar”, ka thënë ai.
Sipas Dedës, institucionet duhet t’u drejtohen qytetarëve për t’i qetësuar dhe për t’u dhënë siguri para verdiktit në Hagë.
“Do të duhej dikush nga institucionet e shtetit t’u drejtohej qytetarëve, që të qetësoheshin, sepse ky është një moment shumë i rëndësishëm. Dita e nesërme ka një peshë shumë të madhe për Kosovën. Unë besoj se, po të kisha qenë udhëheqës i shtetit, do t’u isha drejtuar njerëzve për t’i qetësuar dhe për t’u dhënë siguri se, pavarësisht pritjeve, besimit dhe shpresës për më të mirën, çfarëdo që mund të ndodhë, edhe nëse është diçka që nuk po e presim, ne do ta tejkalojmë dhe do të triumfojmë në fund. Pra, njerëzit duan të dinë se kanë mbështetje në shtet”, ka thënë ai.
Ndryshe, verdikti përfundimtar ndaj Hashim Thaçit, Kadri Veselit, Rexhep Selimit dhe Jakup Krasniqit pritet të shpallet nesër, më 16 shtator, nga ora 10:00, në objektin e Dhomave të Specializuara të Kosovës në Hagë.
Ata akuzohen për krime lufte dhe krime kundër njerëzimit, akuza për të cilat janë deklaruar të pafajshëm./teve1.info/
