Në fund të muajit mars, punëtorët e sektorit publik morën pagën e 13-të.
Por përveç saj, këta punonjës pritet që ta marrin edhe të 14-tën.
Kështu deklaroi të dielën, kryeministri Albin Kurti gjatë prezantimit të ekspozesë.
Madje ai kishte edhe një premtim për punëtorët e sektorit privat.
“Me rritjen ekonomike do të vazhdojë rritja e pagave në sektorin publik, ku paga mesatare, sipas pritjes së tanishme, do ta kalojë shumën prej 1 mijë euro në muaj. . Në këshillim me bizneset dhe punëtorët do të ndërmarrim nismën për pagën e trembëdhjetë në sektorin publik dhe privat, që do të vazhdojë edhe në vitet në vijim, me synimin që më pas të planifikohet edhe paga e katërmbëdhjetë”, ka thënë Kurti.
Por sa janë të realizueshme këto premtime të Kurtit?
“Nuk e di mënyrën e realizimit të kësaj pagës së 13-të me sektorin privat, marrëveshjet në çfarë mënyre. Ne kemi pasur disa kur qeveria së bashku me akterët bizneset, sindikatat që me vendos pagën minimale për me vendos një dialog social, kurse tash po afrohet që është në vullnetin e sektorit privat. Këto premtime dhe ky prononcim i kryeministrit është në këtë drejtim për të joshur për të dhënë votën në drejtimin e partisë së tij”, u shpreh profesori i ekonomisë, Fidan Qerimi.
Premtimi i Kurtit për pagë të 14-të për sektorin publik, sipas Sindikatës së Sektorit Privat po krijon një pabarazi ndërmjet punëtorëve.
Madje kryetari i kësaj Sindikate kërkon që edhe punëtorëve të sektorit privat t’u bëhet ndarja e pagës së 13-të nga buxheti i shtetit.
“Kryeministri kur dëshiron më nda diçka, ai duhet me nda prej buxhetit të vet jo prej buxhetit të kompanive sepse kompanitë aty ku e ndijnë dhe e shohin që kanë mundësi ato e bëjnë vetë dhe nuk ka nevojë më iu thënë kryeministri se nuk menaxhon kryeministri me buxhetin e kompanive”, tha kryetari i Sindikatës së Sektorit Privat, Jusuf Azemi.
Sipas Azemit, problematikë vazhdon të jetë moszbatimi i pagës minimale, ku në shumë institucione publike punëtorët paguhen më pak se 500 euro.
