Moderatori i emisionit “Matrix”, Mehmet Kalisi, ka reaguar lidhur me një fragment të emisionit të fundit, i cili është shpërndarë në rrjetet sociale dhe ku pretendohet se analisti Ilir Kulla ka deklaruar se “shqiptarët janë të ardhur”.
Kalisi ka thënë se bëhet fjalë për një fragment të shkëputur dhe të montuar në mënyrë tendencioze, duke theksuar se deklarata e Kullës është nxjerrë jashtë kontekstit.
Në një reagim të publikuar në rrjetet sociale, Kalisi ka dhënë sqarimet e tij për atë që, sipas tij, është thënë gjatë emisionit.
“DEMANT PUBLIK
Në rrjetet sociale po qarkullon një fragment i shkëputur dhe i montuar në mënyrë tendencioze nga emisioni ‘Matrix’, përmes të cilit tentohet t’i atribuohet analistit Ilir Kulla deklarata se ‘shqiptarët janë të ardhur’.
Kjo është e pavërtetë dhe paraqet manipulim të qartë të deklaratës së tij.
Në emision, z. Kulla nuk e ka paraqitur këtë pretendim si qëndrim personal. Përkundrazi, ai ka sqaruar se pretendimi se ‘shqiptarët janë të ardhur’ është tezë e historiografisë dhe propagandës serbe kundër autoktonisë së shqiptarëve.
Duke e prerë pjesën ku sqarohet se bëhet fjalë për një tezë serbe, deklaratës i është ndryshuar qëllimisht kuptimi dhe ajo është nxjerrë tërësisht jashtë kontekstit”, ka shkruar Kalisi.
Ai ka bërë të ditur gjithashtu se është publikuar edhe videoja e plotë e emisionit, duke u bërë thirrje publikut dhe mediave që ta verifikojnë deklaratën në tërësi para se ta shpërndajnë.
“Sqarimi është i thjeshtë: Ilir Kulla e ka cituar dhe shpjeguar një tezë serbe, nuk e ka mbështetur atë”, ka përfunduar Kalisi në reagimin e tij.
