Qeveria e Kosovës ka falënderuar organizatorët dhe mijëra qytetarët që morën pjesë në “Marshin për Liri” të mbajtur sot në Prishtinë.
Në një reagim pas përfundimit të marshit, Qeveria ka vlerësuar pjesëmarrësit për sjelljen paqësore, paraqitjen dinjitoze dhe qëndrimet e shprehura gjatë organizimit.
Marshi u mbajt me kërkesën për lirimin e Hashim Thaçit, Kadri Veselit, Jakup Krasniqit dhe Rexhep Selimit, të cilët po mbahen në paraburgim në Dhomat e Specializuara në Hagë.
Qeveria ka vlerësuar veçanërisht bashkëpunimin e organizatorëve dhe pjesëmarrësve me organet e rendit dhe sigurisë, duke theksuar se kjo ka kontribuar në mbarëvajtjen e qetë dhe të sigurt të marshit.
“Shprehim mirënjohje edhe për mijëra qytetarë pjesëmarrës, për sjelljen paqësore, paraqitjen dinjitoze dhe qëndrimet e qarta të shprehura gjatë këtij organizimi”, thuhet në reagimin e Qeverisë./teve1.info/
