Flamuj kuq e zi, simbole kombëtare dhe qytetarë të shumtë janë parë këtë të shtunë në lagjen Ulpiana të Prishtinës, pak orë para nisjes së marshit “Kosova po pret”.
Në këtë pjesë të kryeqytetit, qytetarë të shumtë kanë dalë për të blerë flamuj e simbole kombëtare, ndërsa përgatitjet janë në vazhdim për marshin që pritet të nisë në orën 14:00 në Prishtinë.
Në mesin e qytetarëve që do t’i bashkohen marshit është edhe Liridon Kabashi, i cili ka thënë se do të marrë pjesë së bashku me familjen.
“Po, gjithsesi do marrim pjesë në marsh. Me familje, me familje. Me familje, domethënë. Presim lirimin e çlirimtarëve dhe kthimin e tyre në Kosovë. Shpresojmë lirimin, por atëherë ata duhet t’i përdorin mjetet e tyre në shkallë të dytë dhe ne besojmë shumë dhe fuqishëm në pafajësinë e tyre”, ka thënë Kabashi.
Edhe Xhevdet Jakaj, ish-pjesëtar i UÇK-së, ka shprehur bindjen se ish-krerët e UÇK-së do të shpallen të pafajshëm.
“Normal që do të lirohen se janë pa faj. Ata kanë luftuar për vendin e vet, s’kanë shkuar me vra askënd në Serbi a kudo, po kanë luftuar për me mbrojt fëmijët e vet, nënat e vet, baballarët e vet, e për atë kanë me u shpallur pa faj. Po, jam ushtar, e kam lënë Zvicrën, 17 vjet kam pasur, vëllain tim kam marrë. Në ’98-ën në Shqipëri jam ka qenë në njësinë speciale në Durrës, një javë, tani kam shkuar në Koshare. Jemi plagosur në Koshare”, ka deklaruar Jakaj.
Në Prishtinë kanë ardhur edhe qytetarë nga Tetova për t’iu bashkuar marshit. Bekim Matrançi nga Pallatica ka thënë se pjesëmarrja në aktivitete të tilla është e vazhdueshme.
“Po, gjithmonë kemi marrë pjesë: në Prishtinë, Tiranë, Shkup, etj. Jemi të bindur se do të lirohen. Janë të pafajshëm dhe do të lirohen, 100% do të lirohen”, ka thënë Matrançi.
Kurse, Bekim Xheladini nga Tetova ka thënë se pret që ish-pjesëtarët e UÇK-së të lirohen, ndërsa ka treguar se edhe vetë ka qenë pjesëtar i UÇK-së në Maqedoni.
“Pa tjetër sot do të vijnë. Pa tjetër sot do të vijnë bashkë. Pa tjetër! I kemi pasur luftëtarë, ashtu. E drejtë! Pa tjetër se e drejtë!”, ka deklaruar Xheladini.
Ndërkaq, Ramazan Mehmeti nga fshati Pallaticë i Tetovës, ka thënë se ka ardhur për të shprehur mbështetjen për ish-pjesëtarët e UÇK-së.
“Jemi në përkrahje të luftëtarëve tanë që kanë dhanë kontributin, rininë për këtë dhe, për këtë rini këtu çka jemi. Edhe i përkrahim, presim pa durim të lirohen. Janë të pafajshëm. Rinia e tyre ka shkuar për këtë vend, për këtë popull, për këtë rini, edhe duhet ky popull shqiptar të ketë përkrahjen e tyre, se po të mos ishin ata, s’ka as Kosovë, as Shqipëri, as shqiptari”, ka thënë Mehmeti.
Marshi “Kosova po pret” do të mbahet sot në Prishtinë, ndërsa qytetarë nga Kosova, por edhe nga trevat shqiptare, pritet t’i bashkohen tubimit.
