Policia e Kosovës ka njoftuar se ka marrë masa të shtuara të sigurisë për “Marshin për Liri”, i cili mbahet sot në Prishtinë nga ora 14:00.
Për shkak të marshit dhe lëvizjes së pjesëmarrësve, do të ketë ndërprerje të përkohshme të qarkullimit në disa rrugë të kryeqytetit.
Sipas Policisë, rrugët që do të bllokohen janë “Agim Ramadani”, “Luan Haradinaj” dhe “Enver Zymberi”. Varësisht nga nevojat operative, mund të ketë kufizime të përkohshme edhe në rrugë të tjera.
Njësitë policore të trafikut do të angazhohen për menaxhimin dhe riorientimin e komunikacionit në rrugët alternative.
Policia u ka bërë thirrje qytetarëve dhe pjesëmarrësve në marsh që të respektojnë udhëzimet e zyrtarëve policorë, me qëllim që aktiviteti të zhvillohet në mënyrë të qetë dhe pa incidente.
“Marshi për Liri” do të zhvillohet në sheshet “Zahir Pajaziti”, “Nëna Terezë” dhe “Skënderbeu”.
Policia ka theksuar se zyrtarët e saj do të jenë të pranishëm në terren para, gjatë dhe pas përfundimit të aktivitetit për të garantuar sigurinë dhe rendin publik./teve1.info/
