Sezoni 2026/27 në Superligën e Kosovës në basketboll, zyrtarisht nis vikendin e ardhshëm.
Më 19 dhe 20 shtator, do të zhvillohen ndeshjet e xhiros së parë, ku do të jenë përballjet Rahoveci 029 – Trepça, Bashkimi – Golden Eagle Ylli, Bora – Vëllaznimi dhe Sigal Prishtina – Peja.
Megjithatë, e veçanta e këtij sezoni është se tetë skuadrat e elitës së basketbollit kosovar, do të drejtohen nga trajnerë të huaj.
Adis Beçiragiq do ta udhëheq Trepçën për sezonin e katërt rresht pas dominimit total në tri sezonet e fundit me ekipin nga Mitrovica.
Bashkëpunimin me trajnerët e huaj prej sezonit të shkuar, i kanë vazhduar edhe Bashkimi, Bora, Peja e Rahoveci 029.
Igor Jovoviq do të jetë në krye të Bashkimit, pastaj Zoran Kashqelan te Bora, Michalis Kakiouzis te Peja dhe Goran Samarxhiev te Rahoveci 029.
Rami Hadar është rikthyer në basketbollin e Kosovës dhe në sezonin e ri, do të jetë në krye të Golden Eagle Yllit, sikurse Jeronimo Sarin që do ta drejtojë Sigal Prishtinën dhe Alek Jonçevski te Vëllaznimi.
Sezoni i ri në basketbollin kosovar, starton zyrtarisht me finalen e Superkupës së Kosovës ndërmjet Trepçës dhe Bashkimit, ndeshje kjo që luhet më 15 shtator në palestrën “Mizahir Isma” në Rahovec.
