Njohësi i çështjeve politike, Shkëlqim Jakupi, ka vlerësuar se Kosova është duke shkuar drejt zgjedhjeve të parakohshme.
Duke komentuar zhvillimet në seancën e sotme konstituive të Kuvendit, përfshirë mosmarrëveshjet rreth zgjedhjes së nënkryetarëve dhe përplasjen mes Haxhiut dhe Simiqit, Jakupi ka thënë se situata e krijuar mund të jetë pjesë e një strategjie për shtyrjen e zgjedhjeve deri në muajin dhjetor.
Sipas tij, zhvillimet e fundit në Kuvend po shoqërohen me veprime që ai i konsideron si shkelje kushtetuese.
“Sot nuk ka qenë tërësisht e pritur moskonstituimi i Kuvendit të Kosovës, megjithëse tashmë dihet se vendi do të shkojë në zgjedhje të parakohshme, për këtë apo atë arsye. Unë po besoj se arsyeja kryesore do të jetë moszgjedhja e presidentit të Kosovës.Veprimet tanimë antikushtetuese që po bëhen brenda tempullit juridik e politik në Kosovë, siç është Kuvendi i Kosovës, vetëm vazhdojnë me shkelje të tjera kushtetuese. Për mendimin tim, është një lojë apo veprim për të shtyrë afatin e zgjedhjeve për muajin dhjetor të këtij viti, kur edhe pritet të vijnë sa më shumë votues apo përkrahës nga diaspora të Lëvizjes Vetëvendosje, ashtu siç ka ndodhur edhe në zgjedhjet e kaluara”, ka deklaruar Jakupi në emisionin “Ditari” në Tëvë1.
Ndryshe, me 62 vota, Albulena Haxhiu e Lëvizjes Vetëvendosje u rizgjodh kryetare e Kuvendit të Kosovës, por procesi i konstituimit mbeti i bllokuar te zgjedhja e pesë nënkryetarëve.
Partitë nuk arritën marrëveshje nëse nënkryetarët duhet të votohen veç e veç apo në pako.
Përplasjet u thelluan edhe pas propozimit të Listës Serbe, ndërsa Haxhiu kërkoi të ndryshohej formulimi “në emër të popullit serb”.
Seanca u shty për të premten, ndërsa Aleanca e bojkotoi atë, duke akuzuar LVV-në për shkelje të afateve kushtetuese./teve1.info/
