Kryetari i LDK-së, Lumir Abdixhiku, ka pritur sot në takim ambasadorin jorezident të Mbretërisë së Norvegjisë në Kosovë, Arne Sannes Bjørnstad.
Sipas njoftimit të LDK-së, në takim është diskutuar për zhvillimet aktuale politike në vend, me theks të veçantë në zhvillimet e fundit në Kuvend dhe seancën e sotme konstituive.
Abdixhiku e ka njoftuar ambasadorin për qëndrimet e LDK-së lidhur me situatën aktuale politike dhe pozicionin e partisë për funksionalitetin e institucioneve.
“Qëndrimet mbi të cilat LDK-ja e ka ndërtuar dhe vazhdon ta mbajë këtë pozicion janë në funksion të mbrojtjes së interesit të Republikës së Kosovës dhe funksionalitetit të institucioneve”, thuhet në njoftim.
Gjatë takimit është diskutuar edhe për rëndësinë e tejkalimit të situatës aktuale politike dhe krijimit të kushteve për funksionim të qëndrueshëm të institucioneve të Kosovës.
Në fund, Abdixhiku ka vlerësuar mbështetjen e vazhdueshme të Norvegjisë për Kosovën, duke shprehur gatishmërinë për thellimin e mëtejshëm të bashkëpunimit dhe partneritetit mes dy vendeve.
