Faton Peci është zgjedhur kryetar i Partisë GUXO, pas vendimit të Kuvendit të kësaj partie.
Peci, i cili aktualisht është kryetar i Komunës së Mitrovicës, tha se e pranon këtë përgjegjësi me përulësi dhe me vetëdijen e plotë për obligimet që bart kjo detyrë.
“GUXO nuk është krijuar për poste, por për një kauzë. Për mua, kjo nuk është garë për një pozitë, por thirrje e obligim për më shumë punë, më shumë bashkim dhe më shumë përgjegjësi”, ka deklaruar Peci.
Ai ka thënë se synon që GUXO të jetë një forcë politike e organizuar, e hapur dhe më e afërt me qytetarët.
Peci ka falënderuar edhe bashkëkryetaren e deritanishme të GUXO-s, Donika Gërvallën, për kontributin dhe punën e saj në rrugëtimin e partisë.
Në deklaratën e tij, Peci ka theksuar edhe prioritetet që, sipas tij, duhet të jenë në fokus të Kosovës, përfshirë forcimin e institucioneve, zhvillimin ekonomik, përmirësimin e arsimit dhe shëndetësisë, sigurinë dhe orientimin euroatlantik.
“Besoj fuqishëm se Kosova meriton institucione të forta, zhvillim ekonomik, arsim e shëndetësi më të mirë, siguri dhe një të ardhme të qartë euroatlantike, me NATO-n, Bashkimin Evropian dhe Shtetet e Bashkuara të Amerikës si partnerët tanë strategjikë”, ka shkruar ai.
Peci është shprehur mirënjohës për besimin e dhënë, duke thënë se nga ky moment përgjegjësia është edhe më e madhe, por edhe vullneti për të punuar është më i fortë./teve1.info/
