Ata thonë se një vendim i tillë dëmton shumë natyrën, teksa nga Komuna sigurojnë se varreza në fjalë nuk do të dëmtojë askënd.
Por ende pa u votuar ky vendim u bë groposja e disa mbetjeve shtazore.
Banorët e këtij fshati po e kundërshtojnë ashpër këtë vendim të Komunës, pasi nuk dëshirojnë që fshati i tyre të humb vlerën që dikur e kishte.
Sylejman Ramadani, banor i fshatit Stublinë thotë se kjo ide është e shëmtuar. Sipas tij nëse realizohet do të prishet pamja e fshatit.
“Me keqardhje mund të them se më është dukur si një ide e shëmtuar një vendim i tillë, me prish pamjen e fshatit tonë. Këtu takohemi për të mirë dhe për të keq prandaj ne me tërë forcën që e kemi do ta kundërshtojmë këtë vendim të komunës do të i ndjekim të gjitha instancat e duhura të mos bëhet’’, thotë ai.
Kundër kësaj shprehet edhe Agim Qerimi.
‘Ne jemi të pakënaqur do të protestojmë dhe nuk do lejojmë të ndodh herëve tjera. Era ka kundërmua një javë ditë dhe e di si është e lejueshme kjo duke pas hapësira me bollëk prej vijës së rrugës vetëm 50 metra larg i kanë varros’’, shprehet ky banor.
‘’Ne si bashkëfshatar të Stublinës nuk e lejojmë komunën e Gjilanit me i varrosë kafshët në fshatin Stublinë, kundërmon aromë dhe është dëm për njerëzit dhe kafshët e tjera’’, thotë Hajriz Haliti.
Por ndryshe mendojnë nga Komuna e Gjilanit. Ata thonë se gropimi i shtazëve të ngordhura në këtë hapësirë nuk paraqet rrezik për askënd.
“Lokacioni është përcaktuar nga një komision i përcaktuar nga kryetari i komunës prej 3 anëtarësh ku realisht komisioni pas analizave në zyre ka vizituar disa lokacione dhe ka konstatua që Komuna jonë nuk ka lokacion më të përshtatshëm për arsye që në atë lokacion nuk ka shpija ku banojnë qytetarët andaj groposja e kafshëve bëhet me kushte sanitare dhe nuk paraqet rrezik për atë zonë’’, thotë Bekim Salihu, drejtor për Gjeodezi Kadastër dhe Pronë.
Ndryshe fshati Stublinë njihet si fshat me natyrë dhe premisa të turizmit të pastër dhe pritet të shpallet fshat turistik me kërkesën e banorëve.
Kronika e realizuar nga Lendrina Kodrolli
