Anëtari i Lidhjes Demokratike të Kosovës, Nuredin Ibishi ka kritikuar menaxhimin e liderishpit të kësaj partie lidhur me çështjen e marrëveshjes për president me konsensual me Lëvizjen Vetëvendosje.
Ai ka thënë se në LDK nuk po dihet nëse kryetar i partisë është Lumir Abdixhiku apo Vjosa Osmani.
Ibishi është shprehur se në situatën aktuale dështimi për formimin e institucioneve do t’i faturohet një pjesë edhe LDK-së.
“S’po dihet saktësisht se kush është, përveç anës legale që Lumir Abdixhiku është kryetar i LDK-së apo Vjosa Osmani, dytë po shkojnë si paralel në qëndrimet e veta. Në bazë të animeve publike, ata po janë bashkë, si binom. Më vjen keq tash të flas keq për partinë, LDK, kur ajo bartë një pjesë të fajit tani, pasi tani nuk ka një qëndrim të përbashkët në një situatë të ndjeshme për Kosovën”, ka thënë ai në emisionin “InfoNata” në Tëvë1.
Ai ka thënë lidershimi i partisë është dashur që të sigurohet për unitet të brendshëm para marrëveshjes me LVV-në për të propozuar Bekim Sejdiun për president, figurën e të cilit ka vlerësuar.
Ibishi ka thënë se LDK ka një udhëheqësi e dobët, duke shtuar se Lumir Abdixhiku do duhej të jepte dorëheqje pas Kuvendit të Jashtëzakonshëm, ku me diferencë të vogël u konfirmua kryetar.
“Mendoj që përfundimisht një lidership i dobët. Është dashtë para se të merret vendimi për atë, të mbahet mbledhja e kryesisë të përcaktohet a i kemi votat dhe mos të vijë në një situatë të përçarjes. Liderishpi i ri i LDK-së është improvizim. Me pas qenë në një situatë të tillë si Abdixhiku kisha dhënë dorëheqje”, ka thënë Ibishi.
Ai ka thënë se LDK pas zgjedhjeve të reja të brendshme duhet të ketë lidership të ri.
Të hënën pas një cikli bisedimesh, Kurti e Abdixhiku arritën marrëveshje që Bekim Sejdiu të jetë kandidat konsensual për president.
Por, këtë marrëveshje gjashtë deputetë të LDK-së, Kujtim Shala, Avdullah Hoti, Armend Zemaj, Arben Gashi, Hykmete Bajrami e Janina Ymeri, u deklaruan kundër kësaj marrëveshje.
Kurti e Abdixhiku ka thënë se marrëveshja ende qëndron, ndonëse nuk janë numrat e sigurt për votimin e presidentit.
