Kryetari i Lëvizjes Vetëvendosje dhe kryeministri në detyrë, Albin Kurti, gjendet në takim me kryetarin e Lidhjes Demokratike të Kosovës, Lumir Abdixhiku.
Takimi është raportuar nga mediat, ndërsa për zhvillimin e tij ka bërë të ditur edhe gazetari i Tëvë1 nga terreni. Ende nuk janë bërë të ditura detajet e takimit, por zhvillimi i tij vjen në një moment kur mes dy partive është krijuar një situatë e re lidhur me kandidaturën për president.
Të martën, pas mbledhjes së Grupit Parlamentar të LDK-së, Abdixhiku deklaroi se gjashtë nga 18 deputetët e kësaj partie kanë bërë të ditur se nuk do ta mbështesin kandidaturën e Bekim Sejdiut për president.
Bëhet fjalë për Hykmete Bajramin, Avdullah Hotin, Kujtim Shalën, Arben Gashin, Armend Zemajn dhe Janina Ymerin.
Ndërkohë, të martën është mbajtur edhe mbledhja e Grupit Parlamentar të Vetëvendosjes. Pas takimit, Kurti tha se deputetët e këtij grupi janë pajtuar për kandidaturën e Sejdiut.
Megjithatë, sipas Kurtit, me refuzimin e gjashtë deputetëve të LDK-së, numri maksimal i votave që mund të sigurohen për kandidaturën e Sejdiut është 74.
Kurti ka deklaruar se marrëveshja politike e arritur me LDK-në për të mbetet valide, por ka bërë të ditur se fillimisht duhet të takohet sërish me Abdixhikun dhe më pas edhe me Kryesinë e Vetëvendosjes.
Bekim Sejdiu u propozua të hënën si kandidat për president, pas dakordimit politik të arritur mes Lëvizjes Vetëvendosje dhe LDK-së.
Takimi i sotëm mes Kurtit dhe Abdixhikut vjen në kuadër të përpjekjeve për të gjetur një zgjidhje lidhur me situatën e krijuar rreth votimit të kandidaturës për president.
