Platforma qytetare “Liria Ka Emër” ka vendosur edhe në Mitrovicë “Orën e Pritjes”, e cila ka nisur numërimin mbrapsht drejt 16 shtatorit, në shenjë pritjeje për drejtësi dhe liri për ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.
Në aktivitet morën pjesë përfaqësues të platformës “Liria Ka Emër”, Eliza Hoxha dhe Ismail Tasholli, ndërsa i pranishëm ishte edhe kryetari i Partisë Demokratike të Kosovës, Bedri Hamza, së bashku me qytetarë të shumtë.
Pas vendosjes së “Orës së Pritjes”, në Mitrovicë u shpalos edhe një baner gjigant me mesazhin: “Në emër të popullit, shpalleni TË PAFAJSHËM!”
Nga Mitrovica, organizatorët përcollën mesazhin se Kosova vazhdon të presë drejtësi dhe kthimin në atdhe të Hashim Thaçit, Kadri Veselit, Jakup Krasniqit dhe Rexhep Selimit.
Aktivitetet e platformës “Liria Ka Emër” do të vazhdojnë në ditët në vijim, në kuadër të organizimeve që kulmojnë me Marshin për Liri, i cili do të mbahet më 12 shtator, nga ora 14:00, në sheshin “Skënderbeu” në Prishtinë.
Qytetarët janë ftuar t’i bashkohen marshit në shenjë mbështetjeje për ish-krerët e UÇK-së dhe për luftën e Ushtrisë Çlirimtare të Kosovës.
