Deputetja e Lidhjes Demokratike të Kosovës (LDK), Hykmete Bajrami, ka dalë publikisht kundër kandidaturës së Bekim Sejdiut për president të Kosovës.
Bajrami ka deklaruar se nuk do ta mbështesë një marrëveshje politike që, sipas saj, do t’ia zgjasë pushtetin kryeministrit në detyrë, Albin Kurti.
Në një reagim të publikuar në rrjetet sociale, ajo ka thënë se vota e saj nuk është deleguar te askush dhe se mandati që ka marrë nga qytetarët e obligon të veprojë në përputhje me bindjet e saj.
“Mbështetja që kam marrë nga qytetarët jo vetëm në zgjedhjet e fundit nuk më është dhënë për të qenë numër në Kuvend dhe as për t’ia zgjatur pushtetin Albin Kurtit”, ka shkruar Bajrami.
Ajo ka theksuar se e konsideron të papranueshme që zgjidhja e krizës institucionale të përdoret si arsye për, siç është shprehur ajo, përqendrimin e mëtejshëm të pushtetit.
“Prandaj, për mua është e papranueshme që sot, në emër të zgjidhjes së krizës institucionale, të bëhemi pjesë e një marrëveshjeje që ia zgjat pushtetin e koncentruar Albin Kurtit”, ka deklaruar deputetja e LDK-së.
Bajrami ka thënë se Kosova ka nevojë për funksionalitet institucional, por mbi të gjitha për balancë të pushteteve dhe kontroll demokratik.
“Po, Kosova ka nevojë për institucione funksionale, por Kosova ka nevojë mbi të gjitha për balancë institucionale, kontroll demokratik dhe llogaridhënie. Përqendrimi i pothuajse gjithë fuqisë institucionale në duart e një partie dhe të një njeriu nuk është zgjidhje, është rrezik për demokracinë dhe dëm për shtetin, tashmë e dëshmuar kjo që gjashtë vite radhazi”, ka shkruar ajo.
Deputetja e LDK-së ka bërë të ditur se është kundër zgjedhjeve të reja, por ka kundërshtuar që shmangia e tyre të jetë arsye për të votuar një marrëveshje që, sipas saj, nuk është konsultuar paraprakisht me deputetët e partisë.
“Jam kundër zgjedhjeve të reja, por shmangia e tyre nuk mund të jetë arsye që deputetët të votojnë një marrëveshje që u prezantohet si fakt i kryer”, ka thënë Bajrami.
Ajo ka pretenduar se emrat e diskutuar për president nuk janë konsultuar më herët me deputetët e LDK-së.
“Emrat e diskutuar për President të Republikës nuk janë konsultuar paraprakisht me deputetët e LDK-së. Nëse nevojiten votat tona, konsultimi është dashur të bëhet para marrëveshjes, jo pasi ajo është arritur dhe është bërë publike”, ka shkruar Bajrami.
Sipas saj, vota e deputetëve nuk mund të konsiderohet e garantuar paraprakisht.
“Askush nuk mund ta negociojë votën e një deputeti dhe pastaj, nëse nuk e merr atë votë, ta bëjë deputetin përgjegjës për zgjedhje të reja”, ka deklaruar ajo.
Bajrami ka ngritur edhe çështjen e afatit kushtetues për konstituimin e Kuvendit, duke thënë se shmangia e zgjedhjeve nuk varet vetëm nga zgjedhja e presidentit.
“Pastaj mos të harrojmë se zgjedhjet nuk shmangen me çdo kusht me zgjedhjen e presidentit sepse Kuvendi për shkak të LVV ka bërë shkelje kushtetuese dhe është kalu afatin 30 ditor për konstituim”, ka shkruar ajo.
Në fund, Bajrami ka thënë se do të vazhdojë ta ushtrojë mandatin sipas bindjeve të saj dhe interesit të vendit.
“Deri në ditën e fundit të angazhimit tim politik do të përpiqem ta përfaqësoj më së miri besimin që më kanë dhënë qytetarët dhe të votoj sipas bindjes sime dhe interesit të vendit”, ka deklaruar ajo.
Ajo ka theksuar se votat e marra nga qytetarët i konsideron përgjegjësi dhe jo vetëm privilegj.
“53,788 vota nuk janë vetëm privilegj, janë përgjegjësi dhe këtë përgjegjësi nuk ia delegoj askujt. Demokraci!”, ka përfunduar Bajrami.
