Instituti Hidrometeorologjik i Kosovës ka bërë të ditur se të martën, më 25 gusht, vendi do të mbizotërohet nga moti kryesisht me diell dhe vranësira të shpërndara.
Temperaturat minimale do të lëvizin nga 11 deri në 15 gradë Celsius, ndërsa maksimalet pritet të arrijnë nga 30 deri në 35 gradë Celsius.
Era do të fryjë nga verilindja me shpejtësi prej 1 deri në 4 metra në sekondë.
Sipas Institutit Hidrometeorologjik të Kosovës, moti i nxehtë gjatë ditës mund të shkaktojë ngarkesë të shtuar termike, veçanërisht te personat e ndjeshëm dhe gjatë orëve të mesditës e pasdites.
Qytetarëve u rekomandohet të shmangin qëndrimin e gjatë në diell, të konsumojnë mjaftueshëm lëngje dhe të kufizojnë aktivitetet fizike gjatë orëve më të nxehta.
Ndërkohë, indeksi UV pritet të jetë i lartë deri shumë i lartë gjatë ditëve me diell, ndaj rekomandohet mbrojtja nga rrezatimi diellor, sidomos në intervalin kohor nga ora 10:00 deri në 16:00.
Temperaturat e larta dhe moti kryesisht i thatë do të favorizojnë pjekjen dhe përfundimin e fazave të zhvillimit të kulturave bujqësore, por njëkohësisht do të rrisin nevojën për ujë. Fermerëve u rekomandohet monitorimi i lagështisë së tokës dhe ujitja sipas nevojës, veçanërisht për kulturat që janë ende në faza aktive të zhvillimit.
