Është arrestuar një person në Mitrovicën e Veriut, pasi dyshohet se kishte sulmuar babain e tij më 22 gusht të këtij viti.
Sipas njoftimit të policisë, dyshohet se personi i arrestuar ka sulmuar babain e tij me gotë qelqi, nga e cila viktima kishte pësuar lëndime trupore.
“Bazuar në hetimet fillestare, dyshohet se rasti ka ndodhur pas një përleshjeje fizike në mes të dy personave, babë e bir. Gjatë përleshjes, i dyshuari dyshohet se e ka sulmuar viktimën, babain e tij, me një gotë qelqi, si pasojë e së cilës viktima ka pësuar lëndime trupore dhe ka pranuar tretman mjekësor”, thuhet në njoftimin e policisë.
Pasi kishte ndodhur ngjarja, policia njofton se i dyshuari ishte larguar nga vendi i ngjarjes. Megjithatë, vendndodhja e tij ishte lokalizuar një ditë më pas, më 23 gusht.
“Pas rastit, i dyshuari ishte larguar nga vendi i ngjarjes në drejtim të panjohur. Pas një pune hetimore, me datë 23.08.2026 zyrtarët policorë kanë arritur ta lokalizojnë dhe arrestojnë të dyshuarin M.E., (2006), i njëjti është arrestuar ne rrugën “Adem Voca” Mitrovicë jug”, thuhet tutje në njoftimin e policisë.
Lidhur me rastin, bëhet e ditur se i dyshuari është intervistuar në prani të avokatit mbrojtës dhe, pas përfundimit të procedurave, me urdhër të prokurorit të shtetit është liruar në procedurë të rregullt.
