Në fshatin Kërvasari të Malishevës një çift bashkëshortor është plagosur nga të shtënat me armë zjarri ku si pasojë e plagëve, gruaja ka humbur jetën, ndërsa bashkëshorti i saj është dërguar për trajtim në Qendrën Klinike Universitare të Kosovës (QKUK).
Rastin e ka konfirmuar zëdhënësja e Policisë për rajonin e Gjakovës, Vlera Krasniqi.
“Me datë 23.08.2026 rreth orës 23:20, jemi njoftuar për një rast të plagosjes me armë zjarri në fshatin Kërvasari-Malishevë. Njësitë policore kanë dalë menjëherë në vendin e ngjarjes, ku në një dhomë gjumi janë gjetur dy persona, një çift bashkëshortor, të plagosur nga arma e zjarrit. Të plagosurve u është ofruar ndihma e parë mjekësore dhe më pas janë dërguar për trajtim në QKUK”, ka thënë ajo për teve1.info.
Policia ka gjetur dhe sekuestruar një armë zjarri, e cila dyshohet se është përdorur në rast.
Rreth orës 01:10, Policia është njoftuar nga QKUK-ja se gruaja, e moshës madhore, ka ndërruar jetë si pasojë e plagëve të marra. Sipas të dhënave të deritanishme, ajo ishte shtatzënë.
“Nga QKUK jemi njoftuar se viktima femër, e moshës madhore, ka ndërruar jetë”, tha ajo.
Në vendin e ngjarjes ka dalë edhe prokurori i shtetit, me vendimin e të cilit rasti është iniciuar si “Vrasje e rëndë”.
Hetimet janë duke vazhduar për të zbardhur plotësisht rrethanat e ngjarjes, përfshirë motivin dhe mënyrën se si ka ndodhur incidenti.
