Këtë dorëzim e kanë bërë organizatorët e këtij peticioni, derisa bashkë me ta ishte edhe deputeti i Partisë Demokratike të Kosovës, Bekim Haxhiu – i cili është edhe iniciues i këtij projektligji, për lejimin e tërheqjes së një pjese të mjeteve nga Trusti.
Ky projektligj ishte hedhur në votim javë më parë në Kuvend, mirëpo nuk kishte kaluar për shkak që deputetët e Lëvizjes Vetëvendosje, kishin votuar kundër tij.
Në seancën parlamentare të 23 qershorit pas një debati të ashpër ndërmjet pozitës dhe opozitës, nuk kaloi projektligji që mundëson tërheqjen e një përqindje të caktuar nga Trusti.
Nga 102 deputetë të pranishëm në sallë, 44 patën votuar “për”, 57 “kundër” dhe 1 “abstenim”.
Para dy vitesh ishte lejuar tërheqja e menjëhershme dhe e parakohshme e 10% të kursimeve pensionale. Sipas të dhënave, asokohe ishin tërhequr mbi 198 milionë euro nga 427,371 kontribues.
Ndërsa, përmes këtij peticioni po synohet që të kthehet sërish në rend të ditës në njërën nga seancat e radhës, për t’u hedhur sërish në votim.
