Zëvendësministëri i Brendshëm në detyrë i Qeverisë, Enver Dugolli, vlerëson se çdo sukses i Kosovës, i pengon Serbisë.
Ai e konsideron si sukses, hapjen graduale të urës së Ibrit në Mitrovicë.
“Secili sukses i Republikës së Kosovës i pengon Serbisë. Ata kanë ëndërruar që atë pjesë të Kosovës do ta kenë nën kontroll. Kanë synuar ta kenë si pikë që të bëjnë shantazhe. Presidenti i Serbisë, Vuçiq reagon sepse i pengojnë sukseset e Kosovës”, ka thënë Enver Dugolli në emisionin “InfoNata” në Tëvë1.
Presidenti i Serbisë, Aleksandar Vuçiq, po lëshon deklarata e po reagon në media për hapjen e urës duke e vlerësuar si rrezik për popullatë serbe.
“Vuçiqi do të vazhdojë me presione, por ne nuk do të ndalemi dhe nuk do të hezitojmë para asnjë lloj presioni të Serbisë. Ne synojmë ta bëjmë një shtet stabil për të gjithë qytetarët. Narrativen se nuk ka siguri në Kosovë, tash nuk e beson më askush. As NATO, as BE dhe askush tjetër. Serbia dikur pretendonte se kishte stabilitet, por ishte e kundërta”, potencoi Enver Dugolli.
