Ky është Kadri Xhemaili, i ulur në bankën e të akuzuarit.
Ajo çka e solli këtu, ishte një koment në rrjetet sociale që e bëri me 22 tetor të vitit 2025.
Përmes tij e kishte kërcënuar kryeministrin në detyrë, Albin Kurti, se do ta privonte nga jeta.
E për këtë koment, Xhemailit iu ngrit një aktakuzë. Fajin për kanosje, Xhemaili, nuk e mohoi.
Për rrjedhojë, ai arriti marrëveshje për pranim të fajësisë me Prokurorinë Speciale.
Por, kjo nuk e shpëtoi nga dënimi me burgim efektiv.
“I akuzuari, Kadri Xhemaili, është fajtor për shkak të veprës penale “kanosje”. Andaj, Gjykata bazuar në dispozitat e Kodit Penal dhe të Kodit të Procedurës Penale, i shqipton dënim me burgim në kohëzgjatje prej gjashtë muajve, i cili dënim do t’i shqiptohet në afat prej 30 ditëve nga dita e plotfuqishmërisë së këtij aktgjykimi”, deklaroi gjykatësi Rrahmab Beqiri.
Gjithë këto zhvillime, nga afër nuk erdhi që t’i përcillte Kurti.
Mirëpo, Gjykata ia theksoi të drejtën që të kërkojë dëmshpërblim.
“Pala e dëmtuar, Albin Kurti, lidhur me kërkesën pasurore juridike udhëzohet në kontest të rregullt civil”, theksoi Beqiri.
Sipas Gjykatës, Kurti nuk e ka arsyetuar mungesën në seancën ku u shqyrtua marrëveshja për pranim të fajësisë mes Prokurorisë Speciale dhe të akuzuarit.
