Ka tri javë që shiritat e sigurisë janë vendosur në disa fshatra të Zubin Potokut.
Kjo meqë në tri lokacione në këtë komunë, filluan gërmimet pas dyshimeve për varreza masive.
E këto dyshime shumë shpejtë u vërtetuan kur në Kalludër të Vogël, u gjetën mbetje mortore të shqiptarëve të vrarë gjatë luftës së fundit në Kosovë.
E të enjten, Kushtrim Gara nga Komisioni Qeveritar Për Personat e Zhdukur, ka zbuluar për Tëvë1, se mbetjet e sa personave u gjetën gjatë gjithë procesit të gërmimeve.
Tutje Gara, tha se gërmimet po shkojnë drejt fundit.
“Në kuptimin e gërmimit, vlerësimit dhe zhvarrosjes së mbetjeve mortore është çështje ditësh, në qoftë se jo sot, nesër, pra gjatë kësaj jave. Mirëpo, në kuptimin e përfundimit në tërësi si proces, pasi është faza e shqyrtimit të mbetjeve, pastaj është çështja e analizave të ADN-së, e cila është çështje e testimit në laborator që kryhet bashkë me partnerët ndërkombëtarë do të marrë pak kohë”, ka thënë ai.
Por, ani pse gërmimet mund të përfundojnë këtu, shumë shpejt mund të nisin në lokacione të tjera.
Krejt kjo pas dyshimeve për varreza të tjera masive në veriun e vendit.
Në lidhje me zbulimin e këtyre varrezave masive, autoritetet serbe në fund të korrikut e arrestuan një person në Serbi.
Këtë të fundit e akuzuan për spiunazh, pasi dha informacione se ku gjenden trupat e 23 personave që dyshohet se i përkasin grupit të njohur si “Grupi i Intelektualëve”.
Ndërsa për vrasjen dhe fshehjen e trupave të tyre, deri me tani Policia e Kosovës i ka arrestuar tre serbë nga Zubin Potoku.
