Deputetja e Aleancës, Albana Bytyqi, është paraqitur në foltoren e Kuvendit derisa ka bërë apel që të konstituohet Kuvendi.
“48 orë nuk janë javë, nuk janë muaj dhe nuk janë pafundësi. Kryesuesi i përkohshëm (Avni Dehari) nuk është kryetar i Kuvendit, ai është aty për ta udhëhequr procedurën. Një funksion teknik nuk mund te shndërrohet në armë politike”, ka thënë Alban Bytyqi.
Ajo ka deklaruar se si përfaqësues të popullit nuk mund të qëndrojnë të heshtur përballë problemeve me të cilat po përballet Kosova.
“E ne si përfaqësues të popullit nuk mund të qëndrojmë të heshtur e ku Kosova ka probleme e sfida të cilat kërkojnë zgjidhje. Para vetes janë shumë tema të cilat duhet të zgjidhen me urgjencë nga spektri politik. Të gjithë e dimë që Kuvendi e institucionet është e nevojshme të formohen, sepse nafta në vendin tonë është 1.78 euro”, tha Bytyqi.
Ajo ka renditur disa nga çështjet që, sipas saj, kërkojnë funksionalizimin e Kuvendit dhe institucioneve.
“Kuvendi e institucionet duhet të formohen sepse ligji i akcizës duhet të shfuqizohet. Kjo e drejtë dhe ky fakt ka krijuar alarm me faktin e faktorizimit të serbëve dhe votimit të tyre në shtetin tonë. Kuvendi e institucionet duhet të formohen sepse çmimi i produkteve të shportës familjare ka kaluar në ekstrem, duke vështirësuar jetën e mirëqenien e qytetarëve. Kuvendi e institucionet duhet të formohen sepse në shtetin tonë janë mijëra të rinj të diplomuar, të cilët kanë nevojë për punë, dinjitet e vazhdim të jetesës në Kosovë”, tha ajo.
Deputetët e Aleancës dhe Partisë Demokratike të Kosovës edhe sot kanë qenë prezentë në sallën plenare të Kuvendit të Kosovës, ku do të duhej të mbahej vazhdimi i seancës konstituive.
