Prokuroria Themelore në Prizren ka ngritur aktakuzë kundër tre personave me inicialet S.D., B.D. dhe A.F., të cilët dyshohen se kanë kryer veprën penale “Kontrabandimi me migrantë”.
Sipas njoftimit të Prokurorisë, ata dyshohen se kanë organizuar dhe drejtuar veprimet për kontrabandimin e 10 migrantëve, të gjithë shtetas të Egjiptit.
“Sipas aktakuzës, më 23 shtator 2025, në afërsi të vendkalimit kufitar të Vërmicës, konkretisht tek ura e fshatit Shkozë, S.D., ka organizuar dhe drejtuar veprimet për kontrabandimin e 10 migrantëve, të gjithë shtetas të Egjiptit, të cilët kishin kaluar në mënyrë të kundërligjshme kufirin Kosovë – Shqipëri.”, thuhet në aktakuzë.
Më tej, thuhet se migrantët është tentuar që me veturë, nga zona e Vërmicës, t’i transportonin në drejtim të pikës kufitare Kosovë-Serbi.
“I akuzuari S.D., kishte marrë me qira një automjet, të cilin më pas ua kishte dorëzuar B.D., dhe A.F., me qëllim që këta të fundit të kryenin transportimin e migrantëve nga zona e Vërmicës në drejtim të pikës kufitare Kosovë – Serbi. Për realizimin e këtij qëllimi, të pandehurit ishin nisur në drejtim të zonës kufitare, ndërsa S.D., kishte komunikuar me B.D., dhe e kishte udhëzuar lidhur me vendin dhe kohën e pritjes së migrantëve”, thuhet më tej në aktakuzë.
Sipas aktakuzës, thuhet se të dyshuarit i kishin pritur migrantët në afërsi të urës në fshatin Shkozë.
“Rreth orës 01:50min, B.D., dhe A.F., kishin ndaluar me automjet në shiritin emergjent të autostradës, në afërsi të urës së fshatit Shkozë, ku kishin pritur migrantët. Në momentin e afrimit të zyrtarëve policorë, në afërsi të automjetit janë vërejtur 10 persona të shtrirë në tokë, të cilët kishin kaluar ilegalisht kufirin dhe ishin duke pritur për t’u transportuar më tej.”, thuhet në aktakuzë.
10 migrantët, sipas aktakuzës, kishin paguar gjithsej 25,000 euro për rrugëtimin nga vendi i origjinës në Serbi.
B.D. dhe A.F. janë ndaluar, ndërsa S.D. është larguar nga vendi i ngjarjes pasi kishte vërejtur ndërhyrjen e policisë.
Prokuroria ka bërë të ditur se prokurori i çështjes i ka propozuar gjykatës që, pas mbajtjes së shqyrtimit gjyqësor, administrimit dhe vlerësimit të provave, të dyshuarit të shpallen fajtorë për veprën penale për të cilën akuzohen dhe të dënohen sipas ligjit.
