Banka Qendrore e Republikës së Kosovës (BQK) ka paralajmëruar qytetarët për mesazhe dhe ftesa të dyshimta që po qarkullojnë përmes aplikacioneve të komunikimit, të cilat ofrojnë mundësi të pretenduara për përfitime nga investimet.
Sipas BQK-së, qytetarët mund të pranojnë mesazhe nga numra ndërkombëtarë, përmes të cilëve ftohen të bashkohen në grupe investimi duke klikuar në lidhje të jashtme.
“Mesazhet mund të krijojnë përshtypjen se bëhet fjalë për mundësi të leverdishme investimi, ndërsa në disa raste aplikacioni mund të shfaqë edhe paralajmërim se përmbajtja mund të jetë keqdashëse”, thuhet në njoftim.
BQK u bën thirrje qytetarëve të tregojnë kujdes të shtuar dhe të mos klikojnë në lidhje të panjohura, të mos ndajnë të dhëna personale apo financiare dhe të mos kryejnë pagesa bazuar në këto ftesa.
Për të rritur sigurinë online, BQK këshillon qytetarët që të ruajnë me kujdes të dhënat e kartelave bankare dhe të mos i ndajnë ato përmes e-mailit, SMS-it apo telefonit me persona të paautorizuar.
Gjithashtu, qytetarët këshillohen të mos hapin lidhje të dyshimta dhe të mos reagojnë ndaj mesazheve që kërkojnë veprim të menjëhershëm.
Pagesat dhe të dhënat bankare nuk duhet të vendosen përmes lidhjeve të dërguara në SMS.
BQK rekomandon përdorimin vetëm të faqeve zyrtare dhe aplikacioneve të verifikuara të bankave, si dhe aktivizimin e njoftimeve për çdo transaksion.
Qytetarët duhet të kontrollojnë rregullisht historinë e pagesave dhe transferave dhe të raportojnë menjëherë çdo mesazh të dyshimtë te banka ose institucioni i tyre financiar.
“BQK mbetet e përkushtuar ndaj mbrojtjes së konsumatorëve dhe rritjes së ndërgjegjësimit të publikut për rreziqet që lidhen me mashtrimet financiare dhe sigurinë digjitale”, theksohet në fund të njoftimit./teve1.info/
