Një zyrtar policor ka pësuar lëndime të rënda trupore, ndërsa pesë persona të tjerë kanë pranuar trajtim mjekësor pas një aksidenti të trafikut në rrugën “Ibrahim Mazreku” në Malishevë.
Sipas Policisë, aksidenti ka ndodhur më 16 gusht, rreth orës 20:20, kur një vozitës dyshohet se për shkak të shpejtësisë së madhe, ka goditur katër vetura dhe më pas edhe zyrtarin policor, i cili ishte duke rregulluar komunikacionin.
Si pasojë e aksidentit, polici ka pësuar lëndime të rënda trupore, ndërsa edhe pesë qytetarë të tjerë kanë pranuar trajtim mjekësor.
Vozitësi i dyshuar është arrestuar dhe, me vendim të prokurorit, është dërguar në mbajtje. Rasti është duke u hetuar nga organet kompetente.
