Albin Kurti nuk ka pranuar t’u përgjigjet pyetjeve për zhvillimet e fundit politike në vend, duke zgjedhur të flasë vetëm për projektin e Parkut Industrial në Livadicë të Podujevës,
Kryeministri në detyrë, i pyetur nga gazetarët për zhvillimet politike, Kurti tha se fokusi i tij ishte përfundimi i projektit për Parkun Industrial, duke përmendur sipërfaqen, rrugën dhe afatin e punimeve.
“Kryesorja është 30 hektarë, 4.6 kilometra rrugë, qendra e kompetencës në anën tjetër edhe 350 ditë punë, parku industrial në Livadicë po mbyllet, urime të gjithëve për këtë gurthemel”, tha ai.
Ai tha se parqet industriale synojnë t’u krijojnë mundësi bizneseve vendore për zgjerimin e kapaciteteve, diasporës për të investuar në vendlindje, si dhe investitorëve të huaj për të zhvendosur një pjesë të prodhimit të tyre në Kosovë.
“Synimi ynë si qeveri është ta transformojmë ekonominë e Kosovës, ta forcojmë prodhimin vendor dhe të krijojmë sa më shumë produkte në lloje dhe në numër Made in Kosova. Jo vetëm t’i zëvendësojmë importet, por edhe të rrisim eksportet në tregjet evropiane dhe ndërkombëtare. Parqet industriale janë të menduara për bizneset vendore, të cilat duan të zgjerohen dhe të rrisin kapacitetet e tyre, për qytetarët tanë nga diaspora që duan të sjellin kapitalin dhe përvojën e tyre në vendlindje, si dhe për investitorët e huaj që shohim mundësi për të zhvendosur një pjesë të prodhimit të tyre në Kosovë”, deklaroi Kurti.
“Kosova ofron një sërë përparësish për investitorët. Sot fillojmë me punime, ndërsa së shpejti pres që ky park të bëhet shtëpi e madhe e re për bizneset”, tha ai.
