Gushti i vitit të kaluar, ishte tronditës për Gjilanin.
Në mes të ditës e në mes të qytetit, u krye një vrasje e trefishtë.
Si të dyshuar për këtë rast, u tha të janë Mefail Shkodra me dy djemtë e tij, Edonisin dhe Engjullin.
Por, ani pse kaloi plot mbi një vit që nga kjo ditë, vendndodhja e tyre ende nuk dihet.
Në këtë formë, tre të dyshuarit mbetën të pakapshëm për drejtësinë.
“Janë shqetësuese për shkak se këta persona duhet të identifikohen se ku gjenden dhe ndaj tyre të ndërmerren veprime konkrete, konform aktakuzave që i kanë ata. Mirëpo, në raste të caktuara ndodhë që personat e tillë që kryejnë vrasje, do të thotë vepra penale të rënda, të gjenden në territore të shteteve ku nuk kemi marrëdhënie bilaterale me ta, që i bie se në një mënyrë i mbrojnë kryerësit e veprave penale, sikurse me Serbinë për shembull, apo vende tjera. Prandaj, është vështirë që pa një bashkëpunim të ndërsjellë mes shteteve të bëhet ekstradimi i personave të tillë”, deklaroi Refki Morina, profesor i lëndëve policore.
E më gjatë se këta tre, në arrati po qëndron Enver Sekiraqa.
Ky i fundit, arriti që organeve të drejtësisë t’u ikte nga duart, pasi gjyqtari Agim Kuqi në vitin 2024, habiti të gjithë kur ia hoqi masën e arrestit shtëpiak.
E gjitha kjo, pasi Sekiraqa më parë ishte dënuat me 25 vjet burgim, për shtytje në vrasjen e policit Triumf Riza në vitin 2007.
Për këtë, ish zv/ministri i brendshëm Valdet Hoxha, thotë se shteti duhet t’i intensifikojë përpjekjet që këta persona të sillen para drejtësisë.
“Shteti duhet ta demonstrojë vullnetin e tij, brenda të mundshmes natyrisht, sepse ka situata ku ata të dyshuarit mund të jenë jashtë shtetit, por ka edhe mekanizma të tjerë, si lëshimi i fletarresteve, fletërreshtimit ndërkombëtar e kështu me radhë. Pra, shteti ka përgjegjësi dhe çdo i dyshuar që është në arrati është potencialisht rrezik për përsëritjen e veprave të tilla apo të ngjajshme penale”, tha avokati Valdet Hoxha.
Një tjetër person që qëndroi gjatë në arrati, ishte edhe Egzon Reshani.
Edhe ky i fundit, për t’iu shmangur drejtësisë në Kosovë, zgjodhi të fshihej në Serbi.
Por, Reshanin, Policia e Kosovës, arriti ta kapte para se ta linte territorin e Kosovës.
“Më datë 03.08.2026, pak pas orës 22:00, Policia e Kosovës, gjegjësisht zyrtarët e Policisë Kufitare, në SPMK-Muqivërcë, gjatë patrullimit dhe mbikëqyrjes së vijës kufitare, në zonën e fshatit Karaqevë e Poshtme, kanë identifikuar një automjet të dyshuar duke lëvizur nga drejtimi i fshatit Breznicë/Serbi, në drejtim të territorit të Republikës së Kosovës.Pas vlerësimit të situatës, zyrtarët policorë kanë ndërmarrë veprime të menjëhershme operative me ç’ rast automjeti është ndaluar në fshatin Novosellë, ku gjatë kontrollit policor, pasagjeri në automjet, i identifikuar si Egzon Reshani, ka tentuar t’i shmanget zyrtarëve policorë duke u larguar me vrap në drejtim të vijës kufitare, përkatësisht drejt fshatit Breznicë/Serbi”, njoftoi Policia e Kosovës.
E gushti i këtij viti, doli të jetë muaji i fundit në arrati edhe për Dukagjin Nikollajn.
Ky i fundit u ekstradua në Kosovë nga një tjetër shtet mosnjohjes, Spanja, si i dyshuar për një vrasje që ndodhi në vitin 2023, në lokalin “Bon Vivant” në Prishtinë.
Kurse rasti më i njohur, mbetet ai i të arratisurit nga burgu i Smrekonicës.
Edhe Faton Hajrizi kishte zgjedhur Serbinë për t’i ikur autoriteteve kosovare, ku vrau një polic serbë, për t’u vrarë më pas nga këta të fundit në korrikun e vitit 2024.
