Të enjten mbrëma, doli në një konferencë për media.
Pas disa takimeve me kryeministrin në detyrë, i pari i LDK-së, Lumir Abdixhiku, tha se partia e tij, do të qëndrojë në opozitë.
Por, këtë qëndrim të LDK-së, duket se e priti mirë, kryeministri në detyrë, Albin Kurti.
Madje, një ditë më pas, Kurti – Abdixhikut, iu referua si mik, teksa shtoi se deklaratën e tij e kishte ndjekur.
“E ndjeka edhe mbrëmë deklaratën publike të mikut tim të kryetari të LDK-së, Lumir Abdixhiku i cili tha që LDK do të qëndroj në opozitë. Unë mendoj që LDK do të duhej të vinte në bashkëqeverisje. Ta kemi një marrëveshje politike, nuk është e thënë që të jetë identike me rezultatin e zgjedhjeve 53 me 18, por edhe deformim i rezultatit nuk mund të jetë. Tash unë e përshëndes thirrjen e kryetarit Abdixhiku që edhe partitë e tjera të jenë gjithëpërfshirëse për presidente. Dhe me këtë ide, unë mbrëmë i kam shkruar të tre kryetarëve të partive, atij të PDK-së, LDK-së dhe Aleancës që sa më parë të takohemi dhe të merremi vesh për presidenti”, theksoi Albin Kurti.
Ky i fundit ka zbuluar edhe ofertën të cilën ia kishte dorëzuar LDK-së gjatë takimeve me Abdixhikun.
“Kur e pamë që nuk janë të interesuar për kryetarin e kuvendit, oferta jonë qysh në pranverë është ripërsëritur tani. Me fjalë të tjera, nëse VV-ja do ta kishte kandidatin për president, e që ju e dini se ishte Glauk Konjufca, atëherë LDK-ja ta marr zëvendëskryeministrin dhe katër ministri. Ndërkaq, nëse kandidati për president është konsensual, ta marr zëvendëskryeministrin dhe tri ministri, sepse VV-ja po heq dorë prej presidentit dhe ta kenë zëvendëskryeministrin dhe tri ministri. A nëse është Glauku, atëherë zëvendëskryeministrin dhe katër ministri. Unë besoj që edhe oferta për kryeparlamentar për LDK-në edhe kjo për bashkëqeverisje ku kryetari i LDK-së, Lumir Abdixhiku, ta zëmë, bëhet zëvendës i imi në qeveri nuk është pak”, pohoi Kurti.
Deklarimin e Abdixhikut, tha ta ketë dëgjuar me kujdes, edhe e para në detyrë e drejtësisë në vend, Donika Gërvlla.
“E kam dëgjuar reagimin disa herë sepse doja t’i kuptoja edhe fjalët mes rreshtave dhe po dua të besoj, sepse jam njeri optimist nga natyra, po dua të besoj që kemi një bazë të mirë, nuk kemi arsye ta bllokojmë zhvillimin e shtetit tonë, përkundrazi kemi shumë arsye për të ecur përpara dhe demokracia këtë e ka, katër vjet dikush është në pushtet, dikush është në opozitë”, tha Gërvalla.
Ndryshe, i pari i LDK-së të enjten, ofertat e LVV për bashkëqeverisje, i cilësoi si dekorative dhe disproporcionale.
