Në Akademinë e Kosovës për Siguri Publike u mbajt sot ceremonia solemne e diplomimit të Gjeneratës së 46-të të Shërbimit Korrektues të Kosovës, ku diplomuan 100 oficerë të rinj korrektues.
Ceremonia shënoi përfundimin e trajnimit profesional 23-javor të kadetëve, të cilët tashmë i bashkohen Shërbimit Korrektues të Kosovës, me përgjegjësinë për të kontribuar në sigurinë, rendin dhe zbatimin e standardeve profesionale në institucionet korrektuese.
Drejtori i Përgjithshëm i Shërbimit Korrektues të Kosovës, Ismail Dibrani, në fjalën hyrëse i ka uruar kadetët për përfundimin e trajnimit dhe ka theksuar përgjegjësinë që mbart profesioni i oficerit korrektues.
“Ligji është udhërrëfyesi juaj. Profesionalizmi është forca juaj. Integriteti është mburoja juaj. Dhe respekti për njeriun duhet të jetë gjithmonë pjesë e mënyrës se si e ushtroni autoritetin tuaj”, ka thënë Dibrani.
Ai ka nënvizuar se misioni i zyrtarëve korrektues nuk kufizohet vetëm në garantimin e sigurisë dhe disiplinës, por përfshin edhe krijimin e mundësive për rehabilitim dhe riintegrim të personave të privuar nga liria.
Në ceremoni ka folur edhe kryeministri në detyrë i Kosovës, Albin Kurti, i cili e ka vlerësuar përfundimin e trajnimit të 100 kadetëve dhe ka theksuar rëndësinë e forcimit të kapaciteteve njerëzore të Shërbimit Korrektues.
“Sot 100 të rinj e të reja po përmbyllin me sukses përgatitjen e tyre profesionale dhe po ecin me detyrën e re në shërbim të shtetit dhe qytetarëve të Kosovës. Të jesh zyrtar korrektues është përgjegjësi e madhe, e cila kërkon disiplinë, integritet dhe përkushtim për sigurinë, rendin dhe dinjitetin e personave të privuar nga liria”, ka deklaruar Kurti.
Sipas Kurtit, gjatë tri viteve të fundit janë rekrutuar rreth 400 zyrtarë korrektues, duke e cilësuar këtë proces si investim në fuqizimin e kapaciteteve njerëzore dhe ndërtimin e një shërbimi korrektues modern e profesional.
Në fjalën e saj, ministrja e Drejtësisë në detyrë, Donika Gërvalla, ka vlerësuar përgatitjen profesionale të kadetëve dhe ka nënvizuar përgjegjësinë e veçantë të shtetit në institucionet ku personave u kufizohet liria.
“Shërbimi Korrektues i Kosovës është pjesë thelbësore e sistemit të drejtësisë, sepse drejtësia nuk përfundon me shqiptimin e një vendimi gjyqësor, ajo dëshmohet edhe në mënyrën se si zbatohet ai vendim”, është shprehur Gërvalla.
Ajo ka thënë se detyra e zyrtarit korrektues kërkon disiplinë, vendosmëri, maturi dhe gjykim të drejtë, veçanërisht në situata ku vendimet duhet të merren nën presion dhe autoriteti duhet të ushtrohet me profesionalizëm.
Gjatë ceremonisë u vlerësua puna dhe angazhimi i kadetëve gjatë procesit të trajnimit, me theks të veçantë te profesionalizmi, integriteti, disiplina dhe respektimi i të drejtave të njeriut.
“Diplomimi i 100 oficerëve të rinj përbën një hap të rëndësishëm në forcimin e kapaciteteve profesionale dhe njerëzore të Shërbimit Korrektues të Kosovës dhe në ngritjen e mëtejshme të standardeve të sigurisë dhe menaxhimit në sistemin korrektues. Me përfundimin e trajnimit, Gjenerata e 46-të nis detyrën e re profesionale me misionin për të shërbyer me përkushtim, profesionalizëm dhe përgjegjësi ndaj institucionit dhe qytetarëve të Republikës së Kosovës”, thuhet ne njoftim.
