Prokuroria Speciale e Republikës së Kosovës, në bashkëpunim me Njësinë e Veçantë Hetimore të Policisë së Kosovës, ka ndërmarrë veprime hetimore që kanë çuar në arrestimin e A.G., gjyqtar në Gjykatën Themelore në Prishtinë.
Sipas Prokurorisë Speciale, A.G. dyshohet për kryerjen e veprës penale “Keqpërdorimi i detyrës zyrtare”.
Hetimet në këtë rast janë zhvilluar për disa muaj, ndërsa gjatë procesit janë siguruar të dhëna dhe prova mbi bazën e të cilave Prokuroria Speciale ka vlerësuar se ekziston dyshim i arsyeshëm për përfshirjen e tij në veprën penale për të cilën është arrestuar.
Autoritetet nuk kanë dhënë detaje të tjera rreth rastit, duke theksuar nevojën për ruajtjen e integritetit të procesit hetimor dhe respektimin e parimit të prezumimit të pafajësisë.
“Prokuroria Speciale dhe Policia e Kosovës mbeten të përkushtuara në luftimin e korrupsionit, keqpërdorimit të detyrës zyrtare dhe veprave të tjera penale, duke vepruar në përputhje me ligjin dhe me standardet e drejtësisë penale”, theksohet në fund të njoftimit./teve1.info/
