Në ora 14:00, brenda selisë qendrore u planifikua të mblidhet grupi parlamentar i Lidhjes Demokratike të Kosovës.
Ndër të parat deputete që shkoi në zyre, ishte Vjosa Osmani.
Ajo shkurtimisht tregoi arsyen e kësaj mbledhje.
“Është takimi i grupit parlamentar, natyrisht për zhvillimet e fundit. Sapo të përfundojë takimi do të kemi deklaratë të përbashkët”, tha Osmani.
Pas saj, erdhën deputetë të tjerë të cilët ishin më të gjatë në deklarime.
Mospjesëmarrjen në Kuvend të LDK-së gjatë së mërkurës, deputeti Anton Quni e arsyetoi se partia e tij distancohet nga situata ku mund të krijohen tensione.
“LDK përmbahet nga situatat që mund të gjenerojnë tensione. Ne bëjmë thirrje të jemi sa më të qetë”, u shpreh ai.
E një tjetër deputet, ngërçin institucional ia faturoi Lëvizjes Vetëvendosje.
“Ajo çka dihet është që kemi një ngërç kushtetues, kemi një bllokadë te Kuvendi i Republikës së Kosovës sepse nga lëvizjet vendimmarrëse, ose më mirë të themi nga kryesuesi i tashmë e seancës”, tha Zemaj.
Pas një mbledhje që zgjati për më shumë se tre orë, një konferencë e mbajti i pari i LDK-së.
Ai njoftoi se janë tërhequr nga bisedimet me Lëvizjen Vetëvendosje dhe çdo kërkesë e tyre.
“Në një balancë të tillë tre ministrore, gjersa LVV mbante kryeministrin, kryeparlamentarin dhe pothuasje gjithë ekzekutivin, LDK-ja do të ishte një forcë e magjinalizuar, e nënshtruar, si dhe pa përgjegjësi që do të na mundësonte ta dërgojmë shtetin përpara. prandaj s’mund ta pranojmë një ofertë të tillë, prandaj e refuzuam një propozim të tillë të tre ministrive dhe zëvendëskryeministrin”, tha Abdixhiku.
Abdixhiku dha arsyet se pse grupi parlamentar erdhi deri tek ky vendim.
“LDK-ja heq dorë nga çdo kërkesë për pjesëmarrje në qeveri. S’e duam asnjë ministri. Le t’i mbajë Lëvizja Vetëvendosje. Heqim dorë nga kërkesa për kryetar të Kuvendit dhe më e rëndësishmja edhe nga kërkesa për të udhëhequr postin e presidentit. Meqë LVV-ja po vlerëson se s’ka nevojë për LDK-në si partnere s’do ta ketë as si dekor. Në rrethana të tilla, do të qëndrojmë në opozitë”, u shpreh ai.
Përkundër kësaj, Abdixhiku u shpreh se LDK-ja është e gatshme, që një president të zgjidhet bashkërisht nga të gjitha partitë.
“LDK është e gatshme të bisedoj me bindje të plota për zgjedhjen e një presidenti që e mbron interesat e Republikës dhe Kushtetutën e saj, që përfaqëson unitetetin e popullit. Për këtë kontribut, LDK nuk kërkon asnjë pozitë dhe asnjë kompromis politik, por ka kritere të qarta për presidentin e ardhshëm. Stabiliteti i shtetit nuk do të më mall për shkëmbim, le ta zgjedhim të gjithë bashkë, presidentin që e mbron republikën dhe Kushtetutën”, deklaroi kryetari i LDK-së.
LDK-ja, që nga zgjedhjet e 7 qershorit mori pjesë në të gjitha takimet që kryetari i LVV-së, Albin Kurti e ftoi, në tentativën për të arritur një marrëveshje politike.
