Prokuroria Themelore në Ferizaj ka kërkuar nga Gjykata Themelore caktimin e masës së paraburgimit ndaj katër të pandehurve, të dyshuar për veprat penale “Vrasja në tentativë”, “Lëndimi i rëndë trupor” dhe “Pjesëmarrja në rrahje”.
Sipas Prokurorisë, të dyshuarit janë O.A., D.A., A.A. dhe A.N., ndërsa rasti ka ndodhur më 10 gusht, rreth orës 00:15, në rrugën “12 Qershori” në Ferizaj, në afërsi të kafiterive “Dritare” dhe “0290”.
Prokuroria dyshon se O.A., pas një mosmarrëveshjeje të mëhershme mes pronarëve të kafiterive, ka nisur përleshjen pas një konflikti verbal me të dëmtuarin Sh.A. Gjatë përleshjes, ai dyshohet se e ka goditur Sh.A. tri herë në qafë me një mjet të mprehtë, konkretisht kaçavidë.
I dëmtuari ka kërkuar ndihmë mjekësore në Qendrën Emergjente në Ferizaj dhe më pas është dërguar për trajtim në QKUK në Prishtinë.
Po ashtu, O.A. dyshohet se ka sulmuar edhe të dëmtuarin A.N., duke e goditur me kaçavidë në krahun e majtë dhe në pjesën e majtë të kokës. Për këtë rast, ai dyshohet për veprën penale “Lëndimi i rëndë trupor”.
Ndërkohë, D.A., A.A. dhe A.N. dyshohen për pjesëmarrje në rrahje, e cila, sipas Prokurorisë, ka rezultuar me lëndim të rëndë trupor ndaj Sh.A.
Të katër të dyshuarit, që nga 11 gushti, ndodhen nën masën e ndalimit prej 48 orësh me vendim të Prokurorit të Shtetit./teve1.info/
