Shkruan: Kim Mehmeti
Parlamenti i Kosovës ia shtoi demokracisë dhe debatit ndërpartiak edhe një element shumë të rëndësishëm: vezët e pulës!
Dhe ishte e pritshme që ata të cilët përballë Albinit – sa i përket ndershmërisë, atdhedashurisë, dijes dhe njohurive politike – ndihen si pula përballë dhelprës, argument të vetëm politik kundër tij ta kenë vezën.
Po aq e pritshme është që Radojçiqi t’u duket më shqiptar se Kryeministri në detyrë i Kosovës, të gjithë atyre që i godet thënia e Kurtit se duhet t’i respektojmë të gjithë ata që morën pjesë në çlirimin e Kosovës, por nuk duhet t’i lejojmë ata të sillen si mercenarë, të cilëve Kosova duhet t’u paguajë përjetësisht haraç.
Megjithatë, asgjë nga këto nuk e arsyeton sjelljen e kryetarit të VV-së, i cili, duke i konsideruar për pronarë të Kosovës vetëm votuesit e vet, është nisur udhës që e çon drejt mendësisë se shteti i takon vetëm partisë që i ka fituar zgjedhjet.
As nuk e arsyeton veprimet që e ndihmojnë; qeverinë maqedonase që shqiptarët e Maqedonisë së Veriut, të papërfaqësuar siç duhet, t’i bëjë pjesë të ‘Botës Serbe’.
Albin Kurti mund ta dijë shumë mirë se rivaliteti ndërmjet kryeministrit dhe presidentit e dëmton Kosovën, se ai rivalitet është jashtëzakonisht i dobishëm për të huajt që e mbështesin presidentin vetëm për ta mohuar rolin e kryeministrit si dhe për ata që duan ta defaktorizojnë këtë shtet të ri.
Albin Kurti mund ta dijë gjithashtu se opozita e do vendin e presidentit, ngaqë një numër i madh i pjesëtarëve të saj i frikësohet së shkuarës së vet hajdute andaj nuk e lejojnë shkarjen e pushtetit gjyqësor nga duart e veta.
Por, megjithatë, shumica e votuesve të Kosovës kanë besuar se Lëvizjes Vetëvendosje do të mund t’i tejkalojë edhe këto pengesa, pa marrë udhën që të çon atje ku ka arritur Piktori i Shqipërisë – që, në emër të forcimit të shtetit, t’i forcosh hajnat e partisë tënde dhe vendin ta shndërrosh në pronë të hajdutëve tu.
Opinioni përmban pikëpamjet e autorit dhe nuk prezanton qëndrimet editoriale të teve1.info
