Ambasada Britanike në Kosovë ka reaguar lidhur me situatën institucionale në vend, duke theksuar rëndësinë e një parlamenti funksional për demokracinë dhe zhvillimin e Kosovës.
Në reagim, Ambasada ka theksuar se parlamenti është “zemra e demokracisë”, pasi mbikëqyr punën e qeverisë dhe mundëson miratimin e ligjeve që kontribuojnë në zhvillimin e shoqërisë dhe ekonomisë.
Ambasada ka vlerësuar se Kosova ka qëndruar për një kohë të gjatë pa një Kuvend plotësisht funksional.
“Parlamenti është zemra e demokracisë. Ai e mban qeverinë përgjegjëse dhe mundëson miratimin e ligjeve që mund ta çojnë përpara shoqërinë dhe ekonominë. Kosova ka qenë pa një parlament plotësisht funksional për shumë ditë gjatë dy viteve të fundit”, thuhet në reagimin e Ambasadës britanike në Facebook.
Tutje, Ambasada britanike gjithashtu ka vlerësuar se përgjegjësia për këtë situatë u takon politikanëve të Kosovës dhe jo sistemit institucional.
Në këtë drejtim, u ka bërë thirrje politikanëve që të veprojnë urgjentisht dhe të bashkëpunojnë për tejkalimin e situatës përmes dialogut dhe negociatave paqësore.
“Kjo është përgjegjësi e politikanëve të Kosovës, jo e sistemit. Tani, ata duhet urgjentisht të punojnë së bashku për ta zgjidhur këtë situatë përmes dialogut dhe negociatave paqësore, në të mirë të popullit të mrekullueshëm të Kosovës dhe partneriteteve të saj ndërkombëtare”, theksohet në reagim./teve1.info/
