Deputeti i Lidhjes Demokratike të Kosovës, Armend Zemaj, ka thënë se afati kushtetues për konstituimin e Kuvendit ka përfunduar, ndërsa ka kërkuar që të ketë lëvizje për tejkalimin e situatës së krijuar.
Ai ka deklaruar se përgjegjësia për zgjedhjen e kryetarit të Kuvendit i takon shumicës parlamentare.
“E gjitha koha kushtetuese është në ditën e sotme. Sipas interpretimit dhe gjykimit tim, nëse hyjmë në një fazë tjetër që nuk ka interpretim shtesë të vendimit kushtetues, apo nuk ka edhe sanksion, ju e dini që për momentin nuk ka ndonjë sanksion për shkelje të vendimit të Gjykatës Kushtetuese. Vetëm vendimet që janë morale gjithmonë kanë qenë të zbatueshme. Shpresoj dhe uroj që sot gjatë ditës të mund të ketë ndonjë lëvizje pozitive, por mbetet të shohim çka është ajo. Votat për zgjedhjen e kryetarit të Kuvendit janë çështje që i takojnë shumicës parlamentare, si pozicion politik.”, u shpreh Zemaj
I pyetur nëse LDK-ja është pjesë e këtij skenari për ndërprerjen e seancës konstituive, Zemaj, që foli pas këtij zhvillimi, tha se partia e tij nuk ishte e informuar
“Jo, ne nuk kemi qenë të informuar. Krejt çka ka rrjedhur e patë edhe vetë nga seanca, ku ishte e pritshme vetëm deklarimi i emrit, sepse nuk ka debat në seancën konstituive. Por ky është Albin Kurti. Ai di edhe të debatojë, edhe të hapë fushata elektorale, edhe të kërkojë shtesa, duke menduar se është një dhe i vetmi mbi Kushtetutën dhe mbi vullnetin politik të dalë nga zgjedhjet e fundit.”, përfundoi Zemaj.
