Kryetari i Lidhjes Demokratike të Kosovës, Lumir Abdixhiku, ka bërë të ditur se takimet me Lëvizjen Vetëvendosje për formimin e institucioneve janë duke vazhduar, duke theksuar se palët kanë shënuar përparim në disa çështje, por jo edhe në temën kryesore – pozitën e presidentit.
Ai tha se synimi i përbashkët është shmangia e zgjedhjeve të reja, të cilat, sipas tij, do t’i shkaktonin dëm vendit.
“Po përpiqemi t’i shmangim zgjedhjet e reja. Duhet kohë, duhet përpjekje. Po përpiqemi që të gjithë ata që i përfaqësojmë t’i mbajmë rreth një zgjidhjeje të përbashkët. Nuk janë të lehta këto procese. Përderisa po përpiqemi, do të thotë se duam të shmangim zgjedhjet e reja. Shkuarja në zgjedhje është dëmi më i madh që i bëhet Republikës”, deklaroi Abdixhiku.
Kreu i LDK-së njoftoi se takimet ndërmjet palëve do të vazhdojnë edhe gjatë ditëve në vijim, duke vlerësuar se ka afrime në disa tema, megjithëse ende mbeten dallime në çështjen e presidentit.
“Do të jem në takime të vazhdueshme. Ka shumë afrime në shumë çështje, por ende kemi distancë në çështjen kryesore që është balanca demokratike. Kuvendi duhet të konstituohet, nuk ka arsye të mos konstituohet. Meqë po takohemi, është shenjë e mirë”, u shpreh ai.
Abdixhiku ritheksoi se qëndrimi i LDK-së mbetet i pandryshuar sa i përket balancës institucionale, ndërsa theksoi se dialogu do të vazhdojë me synimin për arritjen e një marrëveshjeje për konstituimin e Kuvendit dhe formimin e institucioneve të reja.
