Mbrëmë u ulën sërish në tavolinën e bisedimeve.
Por as takimi i dytë, s’prodhoi një marrëveshje mes Vetëvendosjes e Lidhjes Demokratike të Kosovës.
Një reflektim nga partitë politike, po kërkojnë njohës të fushës.
Sipas tyre, duhet të arrihet një dakordësi, në mënyrë që të shmanget thellimi i krizës institucionale.
“Që të arrihet marrëveshja duhet konsensus në mes të dyja palëve, sidomos me fituesin e zgjedhjeve. Nuk është e qëndrueshme kur thuhet se përgjegjësia bie vetëm mbi partinë më të madhe për krijimin e institucioneve, sepse ajo nuk ka faj që legjislacioni nuk ia garanton të drejtën e fitores, por e detyron të shkojë në koalicion”, thotë Ibrahim Shala, analist politik.
Sipas Shalës, zgjedhjet e reja nuk i konvenojnë asnjë subjekti politik.
“Asnjëra palë nuk ka deklaruar rrjedhën e takimit që ka qenë brenda, dhe kjo është një shpresë që ata ende kanë kohë të merren vesh për krijimin e institucioneve”, shprehet ai.
Edhe analisti tjetër politik, Jeton Halimi, vlerëson se kompromisi është i domosdoshëm, në të kundërtën vendi mund të shkojë në zgjedhje të reja.
“Është e dëmshme nëse shkohet në zgjedhje dhe shpresoj të gjendet një formulë e përbashkët mes Kurtit dhe Abdixhikut për të mos e çuar vendin në zgjedhje, por për të formuar institucionet”, thotë Jeton Halimi –analist politik.
Kujtojmë se Albin Kurti dhe Lumir Abdixhiku ishin takuar edhe më 10 korrik, por edhe atëherë nuk kishin arritur një marrëveshje.
