Ish-ministri i Mjedisit, Planifikimit Hapësinor dhe Infrastrukturës, Liburn Aliu, është intervistuar për më shumë se tri orë nga Prokuroria Speciale e Kosovës.
Ndonëse nuk bëri të ditur arsyen e ftesës nga Prokuroria, Aliu tha se ndihet i lehtësuar që më në fund ka pasur mundësinë të japë sqarimet e tij. Sipas tij, për dy vjet ka zgjedhur të mos reagojë publikisht ndaj akuzave dhe pretendimeve që janë bërë për periudhën sa ka ushtruar detyrën e ministrit.
“Pas dy vitesh heshtje, pata mundësinë ta sqaroj situatën para Prokurorisë lidhur me të gjitha sulmet dhe pretendimet e vazhdueshme ndaj meje, të cilat me kalimin e kohës vetëm sa janë degraduar. Gjatë gjithë periudhës sa kam qenë ministër kam vepruar në përputhje me ligjin dhe sipas rekomandimeve të Zyrës Kombëtare të Auditimit. Nuk ekziston asnjë vendim që mund të më ndërlidhë me këtë proces. Sa i përket pretendimeve për mosveprim, i gjithë rasti është audituar nga ZKA-ja dhe është vepruar në përputhje me rekomandimet e saj. Ishte një mundësi e mirë që t’i sqaroj të gjitha këto para Prokurorisë dhe ndihem i lehtësuar”, deklaroi Aliu.
