Instituti Kombëtar i Shëndetësisë Publike të Kosovës (IKShPK) ka njoftuar se në Kosovë janë konfirmuar 99 raste me fruth gjatë nga 16 prilli deri me 3 gusht.
Vetëm gjatë javës së fundit janë regjistruar 21 raste të reja, ndërsa numri më i madh i të prekurve është raportuar në Prishtinë, me 33 raste.
Sipas të dhënave të IKShPK-së, pas Prishtinës renditet Fushë-Kosova me 25 raste, Ferizaj me 12 dhe Kaçaniku me 7 raste. Nga tri raste janë raportuar në Drenas, Lipjan dhe Obiliq, ndërsa nga dy raste në Gjilan, Skenderaj, Shtime dhe Vushtrri.
Raste të veçanta janë regjistruar edhe në Deçan, Graçanicë, Podujevë, Shtërpcë dhe Viti.
IKShPK ka bërë të ditur se numri i rasteve këtë vit është më i lartë krahasuar me të njëjtën periudhë të vitit 2025, kur ishin raportuar 65 raste. Ndërkohë, gjatë viteve 2021–2024 në Kosovë ishin regjistruar vetëm tri raste me fruth, të gjitha të importuara.
Instituti ka kërkuar nga qytetarët që personat me simptoma të dyshimta si temperaturë të lartë, skuqje në lëkurë, kollë, rrufë ose konjuktivit të paraqiten menjëherë në institucionet shëndetësore.
Për shkak të përhapjes së shpejtë të fruthit dhe rrezikut për komplikime, IKShPK u ka bërë thirrje prindërve dhe kujdestarëve që të kontrollojnë statusin e vaksinimit të fëmijëve dhe të sigurojnë vaksinimin sipas Kalendarit të rregullt të imunizimit.
Sipas IKShPK-së, vaksinimi mbetet mënyra më efektive për parandalimin e fruthit dhe mbrojtjen e shëndetit publik.
