Edhe korriku i vitit 2026 i gjeti duke punuar.
Zhurma e këtyre mjeteve në objektin e destinuar për shkollën “Gjin Gazulli” në Prishtinë, po dëgjohet prej afro pesë vitesh.
Megjithatë, tani duket se punimet janë drejt fundit. Madje, edhe bankat shkollore janë sjellur në hapësirat e objektit.
Tëvë 1, kishte raportuar edhe më herët për mos përfundimin e këtyre punimeve.
Gjitha këto renovime në shkollën vjetër të Ekonomisë në kryeqytet dhe një pjese të objektit të vjetër të Fakultetit të Bujqësisë u bënë që të sistemoheshin nxënësit e “Gjin Gazullit”, objekti i së cilës shkollë do të shndërrohej në Qendër e Kompetencës së TIK-ut.
Financues i këtij projekti është ambasada e Luksemburgut.
Vet ambasadori i Luksemburgut, në shtatorin e vitit 2025, bashkë me të parin e kryeqytetit, Përparim Rama, doli në teren për ta parë ecurinë e punimeve.
Asokohe, Eric Dietz i kërkoi llogari kompanisë fituese të tenderit, Itrast, për zvarritjen e punimeve.
Afati i vendosur nga ambasada nuk u realizua. Kështu, LuxDev shkëputi kontratën, dhe tash punët po i kryen një operator tjetër ekonomik.
Mirëpo, nga LuxDev nuk dhanë informacione për vlerën e kontratës së nënshkruar.
“Në lidhje me kërkesën për informacion, LuxDev e trajton informacionin mbi kontratat si konfidencial dhe nuk mund të ndahet publikisht. Ndërkohë, po bëjmë te pamundurën që punët ndërtimore të finalizohen në kohë për ta mundësuar fillimin vitin e ri shkollor në të”, tha Veton Kasapolli –zyrtar për komunikim.
E sipas drejtori të shkollës, Bujar Gjoci premtimet janë që punimet do të përfundohen më 1 shtator.
“Fatmirësisht i ka ardhur fundi edhe kësaj pune shumë vjeçare, kompania e cila ka qenë duke punuar iu ka ndërprerë kontrata tash ka marrë një kompani tjetër është duke punuar me një dinamikë shumë të madhe edhe sipas premtimeve të drejtorit të DKA-së ne shpresojmë që më 1 shator do të starojmë në shkollën e re”, u shpreh ai.
Edhe drejtori i arsimit në Prishtinë, Arianit Elshani, thotë se dyert e këtij objekti për nxënësit e “Gjin Gazullit” pritet të hapen me fillimin e vitit të ri shkollor.
“Ky ka qenë shqetësim i të gjitha palëve të përfshira duke përfshirë këtu edhe ministrin e arsimit por edhe LUXDEV-in, që kanë pas sfida me operatorin e kaluar. Janë çështje dhe procedura që janë zhvilluar prej LUXDEV-it. Unë kur e kam marrë detyrën e kam gjet të gatshme gjithë procedurën e operatorit të ri që është angazhuar, besoj që intensiteti i nalt i punës po vërehet dhe është evident dhe shtatori do të gjejë nxënësit e “Gjin Gazullit” në objektin e ri”, thotë Arianit Elshani – drejtor i Arsimit.
Që prej vitit 2022 janë dhënë premtime për funksionalizimin e këtij objekti, për renovimin e së cilit kompanisë së parë iu dhanë 4 milionë euro.
Afër 4 milionë euro për shkollën që nuk po përfundohet që katër vite
