Politologu Avdi Smajlaj vlerëson se kryetari i konfirmuar i Lidhjes Demokratike të Kosovës, Lumir Abdixhiku, pas Kuvendit të së enjtes, është dashur që të largohet nga kjo pozitë pasi gjysma e delegatëve janë kundër tij.
“Dorëheqja e Abdixhikut është dashur të ndodhte pa e mbajtur Kuvendin fare. Gjysma e delegatëve janë kundër tij. Ai e ka të vështirë që ta ushtrojë detyrën e tij, pasi nuk e ka përkrahjen e plotë. As partia e as shteti nuk varen nga një individ”, ka deklaruar Avdi Smajlaj në emisionin “Ditari” në Tëvë1.
Tutje, Smajlaj e komentoi edhe mënyrën se si ka shkuar Kuvendi i fundit i LDK-së.
“Mënyra se si ka shkuar Kuvendi është bërë si përpjekje për ta marrë partinë Abdixhiku dhe Vojsa Osmani dhe po përgatitet tereni për t’i larguar disa figura të rëndësishme brenda partisë”, vlerësoi ai.
Ndër të tjera Smajlaj pohoi se LDK tashmë është ndarë në dysh.
“Në të ardhmen disa deputetë të rëndësishëm mund të mos vendosen fare në listë për t’u futur në Kuvendin e Kosovës”, theksoi Avdi Smajlaj.
